وفاقی وزیرِ اطلاعات دا دارالعلوم حقانیہ اکوڑہ خٹک دا دورہ، امن، رواداری اتے قومی یکجہتی ودھاوݨ دی لوڑھ اے، عطاء اللہ تارڑ

اکوڑہ خٹک۔22 ستمبر(اے پی پی)وفاقی وزیرِ اطلاعات و نشریات عطاء اللہ تارڑ وزیراعظم دی ہدایت تے دارالعلوم حقانیہ اکوڑہ خٹک دا دورہ کیتے۔ وزیراعظم دے کوآرڈینیٹر برائے اطلاعات و خیبر پختونخوا امور اختیار ولی خان اتے رکنِ صوبائی اسمبلی جلال خان وی وفاقی وزیر دے نال ہن۔ دارالعلوم حقانیہ اکوڑہ خٹک آوݨ تے قومی پیغامِ امن کمیٹی دے اراکین، دارالعلوم حقانیہ دے نائب مہتمم مولانا راشد الحق حقانی، جمعیت علماء اسلام (س) دے امیر مولانا عبدالحق ثانی، مولانا سید محمد یوسف شاہ اتے ٻئے اکابرین وفاقی وزیرِ اطلاعات دا استقبال کیتے۔ ایں موقع تے قومی پیغامِ امن کمیٹی دے اراکین اتے مختلف مکاتبِ فکر دے جید علماء کرام وی موجود ہن۔ قومی پیغامِ امن کمیٹی دے اراکین اتے علماء کرام نال ملاقات اچ قیامِ امن اتے مذہبی ہم آہنگی بارے الایا۔ انہاں ملک اچ امن اتے استحکام ودھاوݨ اتے دہشتگردی دے خلاف قومی یکجہتی تے ڳالھ مہاڑ کیتی۔ وفاقی وزیرِ اطلاعات آکھیا جو امن، رواداری اتے قومی یکجہتی ودھاوݨ دی لورھ اے، قومی پیغامِ امن کمیٹی قیامِ امن، مذہبی ہم آہنگی اتے دہشتگردی دے خلاف قومی بیانیے کوں مضبوط بݨاوݨ اچ اپݨا کردار ادا کریندی پئی اے۔ عطاء اللہ تارڑ آکھیا جو وزارتِ اطلاعات و نشریات قومی پیغامِ امن کمیٹی دے ذریعے امن اتے استحکام دا سنیہا لوکاں تئیں پچیندی پئی اے۔ ایں موقع تے وفاقی وزیرِ اطلاعات عطاء اللہ تارڑ اتے قومی پیغامِ امن کمیٹی دے اراکین دارالعلوم حقانیہ دے مختلف حصیاں دا دورہ کیتا جتھاں انہاں کوں دارالعلوم دے مہتمم ولوں تعلیمی اتے دینی خدمات دا  ݙسایا۔ وفاقی وزیر دارالعلوم اچ تاریخی جامع مسجد عبدالحق دا وی دورہ کیتا۔ قومی پیغامِ امن کمیٹی دے پلیٹ فارم توں علماء کرام قیامِ امن اتے قومی یکجہتی دا عزم دوہریندے امن ودھاوݨ اتے دہشتگردی دے خاتمے کیتے مشترکہ کوششاں تے زور ݙتے۔ وفاقی وزیرِ اطلاعات عطاء اللہ تارڑ اتے قومی پیغامِ امن کمیٹی دے اراکین شیخ الحدیث مولانا محمد ادریس ترنگزئی، مولانا حامد الحق حقانی تے مولانا سمیع الحق شہید دے درجات دی بلندی کیتے دعا کیتی۔