ذہنی صحت دے بغیر صحت دا تصور نامکمل، قومی ذہنی صحت پالیسی مشترکہ قومی سمت متعین کریندی اے، سید مصطفیٰ کمال

اسلام آباد۔1 اکتوبر (اے پی پی) وفاقی وزیرِ صحت سید مصطفیٰ کمال آکھیے جو ذہنی صحت دے بغیر صحت دا تصور نامکمل اے، قومی ذہنی صحت پالیسی پاکستان اچ ذہنی صحت دے شعبے کیتے مشترکہ قومی سمت متعین کریندی اے، ذہنی صحت دیاں خدمات کوں ودھارا صحت، روکݨ، ابتدائی تشخیص، علاج، بحالی تے صحت یابی دے پورے تسلسل نال منسلک کیتا ویسی، چھل تے ٻئے ہنگامی حالات اچ ذہنی صحت دی ضرورتاں کوں قومی رسپانس دا حصہ بݨایا ویسی تے ڈیجیٹل ہیلتھ سروسز دے ذریعے گھٹ سہولتاں آلے علاقیں تئیں ذہنی صحت دیاں خدمات پڄائیاں ویسن۔ اے ڳالھ انہاں ݙو ݙینھ وار پاکستان گلوبل مینٹل ہیلتھ سمٹ 2026 دی افتتاحی تقریب توں خطاب کریندے آکھی۔ ایں موقع تے قومی ذہنی صحت پالیسی دا اجرا کیتا ڳئے۔ پالیسی دا مقصد ملک اچ ذہنی صحت دی خدمات کوں تکڑا بݨاوݨ تے ہر خاندان تئیں ذہنی صحت دیاں سہولتاں دی رسائی یقینی بݨاوݨ اے۔ سمٹ دے افتتاحی سیشن توں خطاب کریندے وفاقی وزیرِصحت سید مصطفیٰ کمال آکھیا جو ذہنی صحت صرف شعبہ صحت دا مسئلہ نی بلکہ قومی ذمہ واری اے، جئیں کیتے صحت، تعلیم، کمیونٹیز تے ٻئے شعبیں وچال مربوط اقدامات ضروری ہن۔ انہاں آکھیا جو اندازیں موجب پاکستان اچ تقریباً 2 کروڑ 40 لکھ لوکاں کوں نفسیاتی معاونت درکار اے جݙاں جو ملک اچ ہر 5 لکھ لوکاں کیتے ہک توں وی گھٹ ماہرِ نفسیات دستیاب اے۔ وفاقی وزیر آکھیا جو انہاں اعداد و شمار دے پچھوں ایہوجیھے ٻال ہن جو سکول اچ مشکلات دا سامݨا کریندے پئن، ایہوجیھے والدین ہن جیڑھے کم نی کر سڳدے تے ایجھے خاندان ہن جیڑھے مدد کیتے کوشاں ہن، ایں کیتے ہرفرد نگہداشت، وقار تے احترام دا مستحق اے۔