حکومتی توجہ نجی شعبے کوں سازگار ݙیوݨ تے مرکوز، ٹیکس فائلرز دی تعداد 57 لکھ توں تجاوز کر چکی اے، وزیر خزانہ محمد اورنگزیب

اسلام آباد۔1 اکتوبر (اے پی پی) وفاقی وزیر خزانہ و محصولات سینیٹر محمد اورنگزیب آکھیے جو حکومت نجی شعبے کوں ضروری سازگار ماحول ݙیوݨ تے توجہ ݙیندی پئی اے تاں جو کاروباری طبقہ ملک دی معاشی ترقی دی قیادت کرسڳے، حکومت دا کم پالیسی تے کاروباری ماحول کوں بہتر بݨاوݨ اے، ٹیکس نظام اچ سادگی تے موثر عملدرآمد دے نتیجے اچ ٹیکس ریٹرن فائلرز دی تعداد ودھ تے 57 لکھ توں تجاوز کرڳئی اے۔ انہاں اے ڳالھ پاکستان سٹاک ایکسچینج اچ نواں ناظم آباد اپارٹمنٹ ریٹ دے حوالے نال گونگ بیل دی تقریب توں خطاب کریندے آکھی۔ وزیرِ خزانہ آکھیا جو حکومت شہریاں کوں رہائشی سہولتاں ݙیوݨ کیتے کم کریندی پئی اے، اپݨا گھر سکیم دے تحت 60 ارب روپے دا اجرا کر ݙتا ڳئے جݙاں جو بینکاں 340 ارب روپے دے قرضیں دی منظوری ݙتی اے۔ وزیرِ خزانہ آکھیا جو پی آئی اے دی نجکاری دے عمل اچ مقامی سرمایہ کاراں دی بھرپور شرکت حوصلہ افزا اے، ݙو کنسورشیمز دی طرفوں مجموعی طور تے تقریباً 1.2 ارب ڈالر دیاں ٻولیاں اچ حصہ گھنݨ ملکی معیشت دے حجم دے لحاظ نال اہم پیش رفت اے، وݙے کاروباری گروپس دا سانجھا اشتراک ایں امر دا عکاس اے جو نجی شعبہ وݙے منصوبیں کیتے رل تے کم کرݨ تے کاروباری حجم ودھاوݨ دی صلاحیت رکھیندے۔ وفاقی وزیر آکھیا جو ترکیہ دے سرمایہ کاراں وی پاکستان اچ سرمایہ کاری اچ دلچسپی ڳھدی اے ، امریکہ اچ تھیوݨ آلیاں ملاقاتاں اچ وݙیاں کمپنیاں معدنیات و کان کنی، زراعت، آئی ٹی، تیل و گیس تے ریفائنریاں دی اپ گریڈیشن سودھے مختلف شعبیں اچ سرمایہ کاری اچ دلچسپی ظاہر کیتی۔ انہاں آکھیا جو حکومت نویں معیشت دے تقاضیں موجب پاکستان کوں پوزیشن کرݨ، سرمایہ کاری ودھاوݨ، برآمدات ودھاوݨ تے نجی شعبے کوں معاشی سرگرمیاں دا مرکزی محرک بݨاوݨ کیتے اصلاحات دا عمل جاری رکھیسی۔