حج 2027ء: وزارتِ مذہبی امور لیبر کوٹہ کیتے حج پورٹل فعال کر ݙتے

اسلام آباد۔1 اکتوبر(اے پی پی)وزارتِ مذہبی امور حج 2027ء دے لیبر کوٹہ دیاں درخواستاں کیتے حج پورٹل فعال کر ݙتے، اداریاں اتے نجی رجسٹرڈ کمپنیاں توں لیبر کوٹہ دیاں درخواستاں دی وصولی شروع کر ݙتی ڳئی اے۔ ترجمان مذہبی امور دے مطابق ادارے اپݨے خرچ تے گھٹ آمدن والے ملازمین کوں حج کرواوݨ دیاں درخواستاں ݙے سڳدن۔ گھٹ آمدن والے ملازمین، صنعتی کارکنان، کان کن اتے ٻئے اہل مزدور ہی اہل ہوسن۔ ترجمان ݙسایا جو ادارے اتے کمپنیاں صرف حج پورٹل دے ذریعے آن لائن درخواست جمع کروا سڳدن، درخواست گزار کمپنی یا ادارہ حج پورٹل اتے اکاؤنٹ بݨا تے متعلقہ ملازمین دی تفصیل درج کریسی۔ وزارتِ مذہبی امور دے مطابق حج واجبات صرف متعلقہ کمپنی یا ادارے دے اکاؤنٹ توں جمع کرائے ونڄ سڳسن۔ ترجمان مذہبی امور آکھیا جو حج 2027ء لیبر کوٹہ کیتے درخواستاں 10 اکتوبر تئیں پہلے آؤ، پہلے پاؤ دی بنیاد تے وصول ہوسن۔