معرکہ حق اچ عظیم کامیابی دی علامت ’’یادگار فتح‘‘ دی عوامی تقریب رونمائی ، یادگار تے دلکش پروجیکشن میپنگ،عوام دی بھرپور شرکت اتے پذیرائی

اسلام آباد۔4 اکتوبر (اے پی پی) معرکۂ حق اچ پاکستان دی عظیم الشان فتح دی علامت ’’یادگارِ فتح‘‘ دی پروقار عوامی تقریبِ رونمائی ہفتے دی شام اتھاں منعقد تھئی جیڑھی جو قوم دے عزم، شجاعت تے تابناک تاریخ دا نشان اے، اے معرکۂ حق دی یاد تے شہداء و غازیاں کوں خراجِ عقیدت دی علامت اے۔

وزارتِ اطلاعات و نشریات تے کیپٹل ڈویلپمنٹ اتھارٹی دی سانجھ نال منعقدہ تقریب اچ دفاعِ وطن دی عظیم داستان دی عکاس ایں یادگار کوں ہݨ عوام کیتے کھول ݙتا ڳئے۔ ایں پرجوش تے رنگا رنگ تقریب اچ موسیقی دا پروگرام تے شاندار پروجیکشن میپنگ شو پیش کیتا ڳئے جیندے اچ معرکۂ حق اچ فتح کوں اجاگر کیتا ڳیا۔پاکستان نال محبت دا والہانہ اظہار کریندے یادگارِ فتح تے عوام دا جمِ غفیر موجود ہئی، عوام بے مثال جوش دا مظاہرہ کریندے جوق در جوق یادگارِ فتح تے پُڄے۔ اے پاکستان نال محبت تے قومی جذبے دی ہک شاندار جھلک ہئی۔ ایں موقع تے ٻالاں دے ہتھاں اچ پرچم، وݙیاں دی اکھیں اچ ہنجو تے ہر دل اچ فخر نمایاں محسوس تھیندا پیا ہئی تے یادگارِ فتح اڄ عوام کیتے کھلی تاں ایویں لڳا جیویں پورا پاکستان ہکی جاہ تے جمع تھی ڳیا ہووے۔مبصرین موجب یادگارِ فتح دا اے بے مثال منظر محض ہک ݙینھ دا جشن نئیں بلکہ ہک نویں دور دا آغاز اے۔ مایوسی دے کالے بادل چھٹ چکئن تے امید دا سجھ طلوع تھیندا پئے؛ قوم اے عزم کر ڳھدے جو اساں ہݨ صرف ترقی، استحکام تے خوشحالی دے رستے تے ٹرسوں تے پاکستان کوں دنیا دے نقشے تے ہک سربلند مقام ݙویسوں۔عینی شاہدین موجب یادگارِ فتح تے شہریاں دی گہما گہمی، فلک شگاف نعرے تے جذبیں نال بھرپور آوݨ ایں ڳالھ دا ثبوت اے جو عوام تے انہاں دے محافظاں وچال محبت تے اعتماد دا رشتہ ناقابلِ تسخیر اے، جینکوں کوئی منفی سازش کمزور نی کرسڳدی۔ ایں موقع تے اسلام آباد دی فضا اچ احتجاج دے نعرے نئیں، صرف پاکستان زندہ باد دی صدا گڄدی رہی۔ یادگارِ فتح عوام کیتے کھلی تاں قوم ترقی، استحکام تے فتح دے راہ تے اپݨا اعتماد ظاہر کیتا۔مبصرین موجب ہک پاسے انتشار دی سیاست ہئی تے ݙوجھے پاسے یادگارِ فتح دا روشن منظر پیش پیش ریہا، تے قوم اپݨا فیصلہ سݨا ݙتا تے شہریاں شہیداں کوں سلام پیش کرتے ترقی تے خوشحالی دا ساتھ ݙتا۔ایں اہم تقریب اچ مختلف شعبہ ہائے زندگی نال تعلق رکھݨ آلے لوکاں شرکت کیتی، جنہاں اچ سماجی و سیاسی شخصیات دے علاوہ کھیݙاں دی دنیا توں چاچا کرکٹ تے ٻئے نمایاں کھیݙاری وی موجود ہن۔ پاکستان شطرنج فیڈریشن دے سربراہ ذیشان نقوی شطرنج دے گولڈ میڈل حاصل کرݨ آلے کھیݙاریاں دے نال تقریب اچ شرکت کیتی۔ تقریب اچ مختلف سکولاں، کالجاں تے یونیورسٹیاں دے طالب علماں وی اپݨے یونیفارم اچ شرکت کیتی۔ایں موقع تے “اے پی پی” نال ڳالھ کریندے وفاقی سیکرٹری اطلاعات و نشریات اشفاق احمد خلیل آکھیا جو ‘یادگارِ فتح’ دا اے یادگاری نشان قوم دی ایں فتح دی علامت اے جیندی بنیاد جرأت، بہادری تے غیر متزلزل عزم تے رکھی ڳئی اے۔ انہاں ‘یادگارِ فتح’ دے افتتاح کوں قوم تے آوݨ آلی نسلاں کیتے باعثِ فخر لمحات قرار ݙتا

۔تقریب دے دوران پروجیکشن میپنگ ٹیکنالوجی دے ذریعے شرکاء کوں یادگارِ فتح دی تعمیر دی مکمل کہانی وی نہایت سوہݨے اندازاچ پیش کیتی ڳئی جیندے اچ یادگارِ فتح دی تعمیر اچ شامل غیر معمولی ٹیم تے یادگار دی تعمیر دے آغاز توں تکمیل تئیں دے سفر کوں اجاگر کیتا ڳئے۔دستاویزی فلم اچ ݙسایا ڳیا جو یادگار اچ پنج محراباں تعمیر کیتیاں ڳئن جیڑھیاں جو اسلام دے پنج ارکان دی علامت ہن جݙاں جو اے محراباں پاکستان دے پنج ستوناں دی وی نمائندگی کریندن جنہاں اچ حکومت، عسکری قوت، میڈیا، عوام تے قومی نظریہ شامل ہن۔یادگار دا ڈیزائن پاکستان دی مسلح افواج دی ترائی سروسز یعنی بری فوج، پاک فضائیہ تے پاک بحریہ دے نال نال سائبر دفاع تے خلائی جنگ دی وی عکاسی کریندے۔ ایں شاندار تقریب اچ عوام دی بھرپور شرکت بے مثال قومی جذبے، حب الوطنی تے ملک دے دفاع دے عزم دی شاندارعکاسی کیتی۔عوامی حلقیں تے ماہرین جدید ٹیکنالوجی تے منفرد فنِ تعمیر دے ایں عظیم شاہکار کوں غیر متزلزل قومی عزم دی لازوال علامت قرار ݙتے۔ ایں یادگار کوں دورِ جدید دے تقاضیں نال ہم آہنگ کریندے ایں اچ پروجیکشن میپنگ دا جدید ترین نظام نصب کیتا ڳئے۔ ایں نظام دی بدولت روشنی، موسیقی تے فنِ تعمیر دا ہک ایہوجیھا حسین امتزاج تخلیق کیتا ڳئے جیڑھا جو ݙیکھݨ آلیں کوں سحر زدہ کر ݙیندے۔تقریب اچ ڳالھ کریندے قومی کرکٹر رضا اللہ پاکستان دی مسلح افواج دی بہادری تے گراں قدر قربانیاں کوں زبردست خراجِ تحسین پیش کیتا۔ انہاں آکھیا جو اساݙی افواج ماضی اچ وی دشمن کوں عبرتناک شکست ݙتی اے تے اڳوں وی ایویں شکستِ فاش ݙتی ویسی۔ انہاں آکھیا جو او پاکستانی ہووݨ تے ٻہوں فخر محسوس کریندن۔ایں موقع تے چاچا کرکٹ معرکۂ حق اچ شاندار فتح تے پوری قوم کوں مبارخ ݙیندے آکھیا جو مادرِ وطن کیتے ہزاراں جاناں وی قربان ہن۔

انہاں آکھیا جو اڄ پاکستان اپݨے کامیابیاں پاروں پوری دنیا اچ ہک نمایاں مقام حاصل کر ڳھدے۔واضح رہے جو اتوار توں یادگارِ فتح سنوار دے علاوہ سارے ݙینہواراں اچ شام پنج توں رات ݙاہ وڄے تئیں عوام کیتے کھلی رہسی۔ یادگار دی سیر کیتے مفت ٹکٹ ویب سائٹ Yadgarefatah.net دے ذریعے حاصل کیتے ونڄ سڳدن۔