نینگر مسئلیں دے حل سانڳے حکومت دے رَلے آپݨا کردار نبھاون، احسن اقبال

اسلام آباد۔16 اکتوبر (اے پی پی) وفاقی وزیر منصوبہ بندی، ترقی و خصوصی اقدامات احسن اقبال آکھیے جو پاکستان دی ساریں توں وݙی طاقت ایں دے نینگر ہن جنہاں دیاں صلاحیتاں کوں قومی ترقی تے معاشرتی مسئلیں دے حل کیتے بروئے کار گھن آوݨ ویلھے دی اہم لوڑھ اے ، نوجواناں کوں محض مسئلیں دی نشاندہی تے تنقید تئیں محدود رہݨ دی بجائے ایجھے قابلِ عمل حل پیش کرݨے چاہیدن جیڑھے جو ملک دے زمینی حقائق، دستیاب وسائل تے مقامی ضرورتاں نال مطابقت رکھیندے ہوون۔اے ڳالھ انہاں بانو شاہین اقدام دے تحت منعقدہ نیشنل یوتھ سلوشن سپرنٹ 2026ء دے ݙوجھے مرحلے نال خطاب کریندے آکھی۔ وفاقی وزیر آکھیا جو اساݙا مقصد نینگراں کوں مسئلیں دا شکوہ کرݨ آلا نی بلکہ انہاں دا حل پیش کرݨ آلا بݨاوݨا اے کیوں جو کہیں وی مسئلے دا پائیدار حل ڳولݨ کیتے ایں دی بنیادی وجوہات کوں سمجھݨ تے انہاں دے تدارک کیتے عملی اقدامات کرݨ ضروری اے۔مقابلے دے ݙوجھے مرحلے اچ طلبہ دیاں ٹیماں منشیات دے استعمال، آبادی اچ ودھارے، صاف پاݨی تے صفائی دیاں سہولتاں ݙیوݨ، سکولاں توں ٻاہروں ٻالڑیاں تے غذائی قلت جیھے اہم معاشرتی مسئلیں تے غور کیتا۔ ٹیم سربراہاں ہر مسئلے متعلق بنیادی چیلنجز دی نشاندہی کریندے ایجھے عملی اقدامات تے تجویزاں پیش کیتیاں جنہاں تے اپݨی اپݨی برادریاں تے مقامی آبادیاں اچ عملدرآمد دے ذریعے مثبت تبدیلی گھن آئی ونڄ سڳدی اے۔احسن اقبال آکھیا جو کامیابی صرف تجویزاں پیش کرݨ اچ نی بلکہ انہاں کوں عملی جامہ پواوݨ تے انہاں دے نتیجے حاصل کرݨ اچ اے۔ انہاں ایں ڳالھ تے زور ݙتا جو نینگراں کوں فنی علم دے نال ابلاغ، قیادت تے زندگی دی ٻئی بنیادی مہارتاں نال وی آراستہ کرݨ ضروری اے تاں جو او اپݨی صلاحیتاں کوں مؤثر انداز اچ بروئے کار گھن آسڳن۔