بنگلہ دیش دا 15 رکنی ثقافتی وفد ثقافتی 4 ݙینھ دے دورے تے اسلام آباد پڄ ڳئے

اسلام آباد۔16 اکتوبر (اے پی پی) بنگلہ دیش دا 15 رکنی ثقافتی وفد پاکستان تے بنگلہ دیش وچال ترائے ݙہاکیں دے وقفے دے بعد ثقافتی تبادلیں دے ودھارے تے ݙوپاسے تعلقات کوں مزید مستحکم بݨاوݨ کیتے 4 ݙینھ دے دورے تے اسلام آباد پڄ ڳئے۔ترجمان وزارتِ قومی ورثہ و ثقافت ڈویژن موجب بنگلہ دیشی وفد دی قیادت حکومتِ بنگلہ دیش دی وزارتِ ثقافتی امور دے جوائنٹ سیکرٹری ایم ڈی میزان الرحمن کریندے پئے ہن۔ اسلام آباد انٹرنیشنل ایئرپورٹ تے وفد دا پرتپاک استقبال کیتا ڳیا۔

اے دورہ حکومتِ پاکستان دے قومی ورثہ و ثقافت ڈویژن دی دعوت تے ترتیب ݙتا ڳئے جیندا مقصد ݙوہیں ملکاں وچال ثقافتی رابطیں کوں ودھارا ݙیوݨ، فنونِ لطیفہ دے شعبے اچ تعاون دے نویں موقع پیدا کرݨا تے عوامی سطح تے رابطیں کوں تکڑا بݨاوݨ اے۔وفد اپݨے چار ݙینھ دے قیام دے دوران 17 تے 18 اکتوبر کوں پاکستان نیشنل کونسل آف دی آرٹس (پی این سی اے) تے لوک ورثہ اچ منعقد تھیوݨ آلی ثقافتی تقریبات تے فنکارانہ سرگرمیاں اچ شرکت کریسی۔ انہاں سرگرمیاں دے ذریعے پاکستان تے بنگلہ دیش دے فنکاراں تے ثقافتی شعبے نال جڑئے لوکاں کوں اپݨی روایات پیش کرݨ، فنون دے شعبے اچ تجربے دے تبادلے تے ݙوہیں ملکاں دے ثقافتی ورثے کوں اجاگر کرݨ دا موقع ملسی۔ ایں دورے توں ݙوہیں ملکاں وچال ثقافتی تبادلیں، فنکارانہ اشتراک تے ادارہ جاتی تعاون دے نویں امکانات پیدا تھیوݨ دی توقع اے۔ ایں دے علاوہ ݙوہیں ملکاں دے فنکاراں تے ثقافتی حلقیں وچال براہِ راست رابطیں کوں ودھارا ݙیوݨ اچ وی مدد ملسی۔ اے دورہ ایں امر دا عکاس اے جو ثقافت قوماں وچال قربت، سانجھے احترام تے مفاہمت دے ودھارے اچ اہم کردار ادا کریندی اے۔ پاکستان تے بنگلہ دیش وچال ثقافتی تعاون دا اے اقدام ݙوہیں ملکاں دے عوام کوں ہک ٻئے دی ثقافتی روایات نال روشناس کراوݨ تے دوستانہ تعلقات کوں مزید مستحکم بݨاوݨ دے پاسے اہم پیشرفت اے۔