اسلام آباد ۔ 10 دسمبر (اے پی پی) صدرمملکت ڈاکٹر عارف علوی مقبوضہ جموں کشمیر اچ فوجی لاک ڈاﺅن، کرفیو اتے انسانی حقوق دیاں پامالیاں تے ودھ ساری تشویش کریندے ہوئیں آکھیے جو پاکستان کشمیریاں دے حق خود ارادیت تے مکمل آزادی دی حمایت کریندے ، حکومت پاکستان انسانی حقوق دے تحفظ تے ودھارے کیتے پرعزم اے ۔ منگل کوں انسانی حقوق دے عالمی ڈینھ تے اپنڑے سنھیے اچ صدر مملکت ڈاکٹر عارف علوی آکھیے جو اے ڈینھ دا مناونڑ انسانی حقوق دے ودھارے کیتے اساڈے پکے عزم کوں نشابر کریندے ۔ انہاں آکھیا جو پاکستان کشمیریاں دے حق خودارادیت اتے آزادی دی حمایت کریندے ۔ صدر مملکت مقبوضہ جموں و کشمیر اچ ،ملٹری لاک ڈاون، کرفیو اتے انسانی حقوق دیاں پامالیاں تے ودھ ساری تشویش کریندے ہوئیں زور ڈتے جو ساریاں عالمی سرکاری ، غیر سرکاری تنظیماں ، میڈیا اتے سول سوسائٹی مقبوضہ کشمیر دے عوام دے انسانی حقوق دے تحفظ تے انہاں دے حق خود ارادیت کیتے کردار ادا کرن۔ انہاں آکھیا جو انسانی وقار دی پاسداری ، انسانی حقوق دا تحفظ، انسانی آزادی اتے مساوات کوں یقینی بنڑاونڑ اساڈے مذہب تے آئین دے بنیادی اصولاں اچوں ہک اے ۔ صدر مملکت آکھیا جو معاشرے دے کمزور تے پسماندہ طبقے دے تحفظ اتے ودھ ساری توجہ ڈیونڑ دی ضرورت اے ۔
