اسلام آباد۔1ستمبر(اے پی پی)وزیراعظم دے مشیر برائے پارلیمانی امور بابر اعوان آکھیے جو 2023ء دے عام انتخابات الیکٹرانک ووٹنگ مشین تے تھیسن، قانون سازی وی ایں سال مکمل تھی ویسی، ایندے کیتے سینیٹ یا مشترکہ اجلاس وی کراوݨا پیا تاں کرویسوں، حکومت ہر ڄاہ تے ای وی ایم ݙکھاوݨ کوں تیار اے۔ اسلام آباد اچ وزیراعظم دے معاون خصوصی سیاسی امور ڈاکٹر شہباز گل نال نیوز کانفرنس کریندے انہاں آکھیا جو آندے انتخابات اچ ای وی ایم استعمال تھیسن، اساں ایندے تے الیکشن کمیشن نال تعاون کریسوں، اپوزیشن کوں وی سمجھداری ݙکھاوݨی چاہیدی اے اتے او ہر ہار تے دھاندلی رووݨ دی بجائے الیکشن دا نیتجہ منݨ دا ݙا سکھے، دھاندلی دا شور مکاوݨ کیتے شفاف انتخابات کرویسوں۔ انہاں آکھیا جو 2013 دے انتخابات اچ 92 ہزار ووٹرز دے انگوٹھیاں دی تصدیق نہ تھی سڳی ہئی اتے دھاندلی کیتے ہک پورا نظام ٻݨایا ڳیا ہا جیندی رپورٹ موجود اے، نوازشریف آکھیا ہا جو پنجاب اچ میکوں ݙو تریہائی اکثریت ݙیوائے، ڄݙاں سارے ووٹر ڳھر لڳے ڳئے ہن تاں ول نوازشریف اے کیکوں آہدے کھڑے ہن؟ بابر اعوان آکھیا جو اوورسیزپاکستانیاں کوں ووٹ دا حق ملݨا چاہیدے بھل اپوزیشن اے نئین چاہندی، اپوزیشن ایں ملک تے رحم کرے اتے ووٹ نال مقابلہ کرے، قوم کوں خوشخبری اے جو اساں ای وی ایم اتے اوورسیز پاکستانیاں کوں ووٹ دے حق کیتے قانون سازی ایں سال ہی مکمل کریسوں۔ بابر اعوان آکھیا ڄݙاں وی اساں کہیں شئے کوں درست کرݨ لڳدے ہیں تاں اپوزیشن آہدی اے جو “جمہوریت کوں خطرہ اے” صرف ݙو کم ہین جیندے نال جمہوریت کوں کوئی خطرہ نئیں، ہک این آر او اتے ٻیا نیب دفتر کوں تالا۔۔ ایں موقع تے معاون خصوصی ڈاکٹر شہباز گل آکھیا جو بھاویں اپوزیشن احتجاج کرے یا پریشر پاوے آندا الیکشن فری اینڈ فیئر تھیوݨے، اے ہݨ تہاݙی مرضی نال نہ تھیسی، اپوزیشن آپݨا چنتا ݙساوے جیکوں ضرور مکیسوں، بعد اچ نہ آکھیے جو ساݙی سݨی نئیں ڳئی۔
