وزیرِاعلیٰ مریم نواز دی زیرِ صدارت اجلاس، پنجاب دی ہر تحصیل اچ الیکٹرک بس سروس شروع کرݨ دا فیصلہ

لاہور۔ 09 ستمبر (اے پی پی) وزیرِاعلیٰ پنجاب مریم نواز دے ویژن دے تحت ڈویژن تے اضلاع بعد ہݨ صوبے دی ہر تحصیل اچ الیکٹرک بس سروس شروع کرݨ دا فیصلہ کیتا ڳئے۔ اے فیصلہ وزیرِاعلیٰ پنجاب دی زیرِصدارت تھیوݨ آلے اجلاس اچ کیتا ڳئے۔ پنجاب اچ تحصیل دی سطح تے الیکٹرک بس سروس دا آغاز جنوری 2027ء توں کیتا ویسی، ڄݙاں جو صوبے دی 91 تحصیلاں اچ مجموعی طور تے 1500 الیکٹرک بساں چلائیاں ویسن۔ وزیرِاعلیٰ مختلف اضلاع کوں ٻیاں الیکٹرک بساں ݙیوݨ دی منظوری ݙیندے پنجاب اچ جون 2027ء تئیں الیکٹرک بساں دی تعداد 3000 کرݨ دا ہدف مقرر کیتے۔ انہاں ستمبر 2026ء دے اختتام تئیں الیکٹرک بس سروس دا پہلا فیزمکمل کرݨ دی ہدایت وی کیتی۔ اجلاس کوں بریفنگ اچ ݙسایا ڳیا جو ہر تحصیل کیتے مخصوص الیکٹرک بس ڈپو دی منظوری ݙے ݙتی ڳئی اے، ڄݙاں جو الیکٹرک بس سروس کیتے پہلا بیچ جنوری 2027ء اچ لاہور پُڄ ویسی۔ بریفنگ موجب ملتان دی 9 تحصیلاں کیتے 169، ساہیوال دی 4 تحصیلاں کیتے 87، بہاولپور دی 11 تحصیلاں کیتے 215، ڈی جی خان دی 10 تحصیلاں کیتے 63، فیصل آباد دی 12 تحصیلاں کیتے 202 تے سرگودھا دی 14 تحصیلاں کیتے 198 الیکٹرک بساں مختص کیتیاں ڳئن۔ ایویں گوجرانوالہ دی 7 تحصیلاں اچ 125، گجرات دی 8 تحصیلاں اچ 122 ڄݙاں جو راولپنڈی دی 16 تحصیلاں اچ 219 الیکٹرک بساں چلائیاں ویسن۔ اجلاس کوں ٻیا ݙسایا ڳئے جو پنجاب دے مختلف اضلاع اچ 612 الیکٹرک بساں مکمل طورتے آپریشنل ہن، جنہاں توں روزانہ لکھاں شہری فیدہ چیندے پئن۔ ملتان سودھے ٻئے اضلاع اچ ٻئے 192 الیکٹرک بساں آندے کجھ ݙینھاں اچ فعال تھی ویسن۔ بریفنگ موجب سرگودھا،ساہیوال، فیصل آباد، لاہور، مظفرڳڑھ، راولپنڈی، جھنگ، بہاولپور، رحیم یارخان تے اٹک کوں ٻیاں الیکٹرک بساں ݙتیاں ویسن، ڄݙاں جو بھکر، حافظ آباد، خانیوال، چنیوٹ، لیہ، اوکاڑہ، سیالکوٹ، مری، گجرات تے شیخوپورہ اچ وی اضافی الیکٹرک بساں چلائیاں ویسن۔ منڈی بہاؤالدین، وہاڑی، قصور، لودھراں، ننکانہ صاحب، نارووال، گوجرانوالہ تے ملتان اچ وی ٻیاں بساں ݙیوݨ دا فیصلہ کیتا ڳئے۔ اجلاس کوں ݙسایا ڳیا جو فیصل آباد تے گوجرانوالہ ماس ٹرانزٹ سسٹم تے پیش رفت تکھے جاری اے، ڄݙاں جو لاہور میٹروبس سروس دے 25 سٹیشنز دی تعمیر و بحالی دے منصوبے وی تکمیل دے مرحلیں اچ ہن۔