پاکستان تے نیوزی لینڈ وچال تجارتی تعلقات دے ودھارےاچ نجی شعبے کوں قائدانہ کردار ادا کرݨا چاہیدے، وزیرِ خزانہ محمد اورنگزیب

اسلام آباد۔ 09 ستمبر(اے پی پی) وفاقی وزیرِخزانہ و محصولات سینیٹر محمد اورنگزیب نال پاکستان اچ نیوزی لینڈ دے نامزد ہائی کمشنر ڈیوڈ پائن ملاقات کیتی۔ ملاقات اچ ݙوہیں ملکاں وچال سانجھے تعلقات، تجارت، سرمایہ کاری تے اقتصادی تعاون کوں ٻیا ودھارا ݙیوݨ تے ڳالھ مہاڑ کیتی ڳئی۔ ہائی کمشنرڈیوڈ پائن یورو بانڈ دے اڄوکے اجرا دے ذریعے پاکستان دی عالمی کیپٹل مارکیٹ اچ کامیاب واپسی تے وزیرِخزانہ کوں مبارخ ݙتی تے کلی معیشت دے استحکام کیتے کیتیاں ونڄݨ آلیاں اصلاحات دی تعریف کیتی ۔ ایں موقع تے وزیرِ خزانہ آکھیا جو پاکستان معاشی استحکام دے حصول اچ نمایاں پیش رفت کیتی اے تے ہݨ حکومت دی توجہ پالیسیاں دے تسلسل، مالیاتی نظم و ضبط تے ڈھانچہ جاتی اصلاحات دے ذریعے سرمایہ کاری، برآمدات تے پائیدار اقتصادی ترقی تے مرکوز اے۔ ملاقات اچ پاکستان تے نیوزی لینڈ وچال بزنس ٹو بزنس (B2B) رابطے کوں ودھارا ݙیوݨ تے خصوصی زور ݙتا ڳئے۔ وزیرِ خزانہ آکھیا جو تجارتی و اقتصادی تعلقات دی مضبوطی کیتے نجی شعبے کوں قائدانہ کردارادا کرݨا چاہیدے ڄݙاں جو حکومت سازگار ماحول تے سہولت کاری ݙیسی۔ ہائی کمشنر ڈیوڈ پائن ایگرو ٹیک تے ٻئے ابھردے شعبیں اچ شراکت داری دی دلچسپی دا اظہار کیتا۔ ایں توں علاوہ، نیوزی لینڈ اچ زیرِ تعلیم پاکستانی طلبہ، بالخصوص زرعی شعبے دے سکالرز دی مہارت توں وطن واپسی تے استفادہ کرݨ تے ڳالھ کیتی ڳئی۔ وزیرِخزانہ پاکستان اچ تکھے ودھدے آئی ٹی، ڈیجیٹل خذمتاں تے نوجوان افرادی قوت دے شعبیں اچ تعاون دے وسیع امکانات کوں اجاگر کریندے آکھیا جو ݙوہیں ملکاں وچال مشترکہ دلچسپی دے شعبیں کوں ٹھوس اقتصادی شراکت داری اچ تبدیل کرݨ کیتے مسلسل رابطہ ضروری اے۔