اسلام آباد۔5ستمبر (اے پی پی) پورے ملک اچ یوم دفاع پاکستان سنوار کوں ملی جوش و جذبے اتے شہدائے وطن دے نال محبت و عقیدت دے ںال منایا ویسی ۔یوم دفاع ہر سال 6 ستمبر کوں 1965 اچ بھارت دی جارحیت دے خلاف اتے ملکی دفاع کیتے افواج پاکستان دے بہادر سپوتاں دی کارکردگی اتے قربانیاں دی یاد وچ منایا ویندے ۔ وفاقی دارالحکومت اچ ݙینھ دا آغاز 31 اتے صوبائی دارالحکومتاں اچ 21 توپاں دی سلامی توں تھیسی ، نماز فجر دے بعد مسیتاں اچ شہدا کیتے قرآن خوانی تھیسی تے ملک دی ترقی، خوشحالی اتے سلامتی کیتے خصوصی دعاواں منڳیاں ویسن ۔ یوم دفاع پاکستان دے موقع تے وفاقی دارالحکومت ،آزاد کشمیر گلگت و بلتستان اتے چارے صوبیں سودھے پورے ملک اچ مختلف تقریبات منعقدرتھیسن۔ وطن دے دفاع کیتے آپݨی جاناں دا نذرانہ پیش کرݨ آلے شہیداں دی یادگاراں تے پھل چڑھاوݨ دیاں تقریباں تھیسن تے فاتحہ خوانی کیتی ویسی۔ شہیداں کوں خراج عقیدت پیش کرݨ کیتے جی ایچ کیو اچ یوم دفاع دی مرکزی تقریب وی منعقد تھیسی۔
