اسلام آباد۔21مارچ (اے پی پی) وزیراعظم عمران خان آکھیا جو پاکستان اچ پہلی واری سوائے سندھ دےملک دے سارے شہریاں کوں یونیورسل ہیلتھ کوریج دی سہولیت ملی اے، ایجھی سہولت دنیا دے ترقی یافتہ ملکاں اچ وی مفت نی ملدی۔ ایجھے بے مثال کماں نال پرائیویٹ پبلک سیکٹر اچ سانجھے داری ودھسی۔ ملک اچ اقتصادی بہتری آئی، سارے معاشی اشاریے مثبت ہن۔ آمدݨ دے مقابلے اچ خرچے ڳھٹ کیتے اتے آمدݨ ودھائی تانجو کہیں غلامی نہ کرݨٰ پووے، 1985 دے بعد وفاقی دارالحکومت اسلام آباد اچ نواں ہسپتال ٻݨیندے پیوں، پمز دے بورڈ آف ڈائریکٹرز دی اہم ذمہ واری اے جو او میرٹ دی پاسداری کرن، حکومتی نظام اچ میرٹ ختم تھیوݨ پاروں بدعنوانی کوں ہوا ملدی اے، بورڈ آف ڈائریکٹرز نجی طرز تے سسٹم ڳھن تے آون اتے میرٹ تےتقرریاں کرن۔ سنوار کوں اسلام آباد اچ پمز ہسپتال دے نویں شعبے اتے سیکٹر جی 13 اچ نویں ہسپتال دے سنگ بنیاد دی تقریب توں خطاب کریندیں ہوئیں آکھی۔ وزیراعظم آکھیا جو اساں شوکت خانم دے ݙو ہسپتالاں دے آرکیٹکٹ پمز ہسپتال دی ایمرجنسی ڈیزائن کروائی اے جئیں دا سارا خرچہ تارکین وطن برداشت کیتے۔ وزیراعظم آکھیا جو ساݙھے ترائے سالیں اچ اڄوکی حکومت عوام کیتے جیڑھا کم کیتے گزریل حکومتاں نی کیتے۔ سندھ دے علاوہ سارے صوبیاں دے رہوݨ آلیاں کوں یونیورسل ہیلتھ کوریج ݙتی ویندی پئی اے۔ وزیر اعظم عمران خان آپݨے خطاب اچ آکھیا جو اساں ایندے نال نال ہکو سواں نصاب تعلیم رائج آلے پاسے اہم قدم چاتے۔ وزیراعظم آکھیا جو اساں سیرت النبیﷺ پڑھاوݨ دا فیصلہ کیتے کیونجو کردار سازی دے بغیر قوم وݙی نی بݨ سڳدی۔ مدینہ دی ریاست پچھوں بنیادی فلسفہ فکر انقلاب ہئی، کݙاہیں تلوار نال انقلاب نی آیا۔ وزیراعظم آکھیا جو رحمت اللعالمین اتھارٹی ٻݨائی اے تانجو یونیورسٹی تئیں دے آپݨے ٻالاں کوں نبی کریم ﷺ دی زندگی اتے انہاں دی تعلیمات بارے تعلیم تے آگاہی ݙے سڳوں۔
