حکومت بہترین بجٹ پیش کیتے، ایں تے ڳالھ کرݨ کیتے وزرا ایوان اچ موجود ہوون ، سید خورشید شاہ

اسلام آباد۔15جون (اے پی پی) وفاقی وزیر آبی وسائل سید خورشید احمد شاہ آکھیے جو موجودہ حکومت بہترین بجٹ پیش کیتے جیں تے کاشتکار انہاں کوں دعاواں ݙیندے پئن لیکن وزرا تے ارکان کوں ایں تے ڳالھ کرݨ کیتے ایوان اچ موجود ہووݨا چاہیدے جݙاں تئیں ممبران ایوان اچ نی آندے او تئیں اجلاس ملتوی کیتا ونڄے جیں تے سپیکر اجلاس 30 منٹ کیتے ملتوی کرݙتا ، قومی اسمبلی اجلاس شروع تھیا تاں وفاقی وزیر سید خورشید شاہ آکھیے جو میکوں ایں ایوان اچ 35 سال تھی ڳئن ایں دوران اساں حکومت تے اپوزیشن ݙوہیں وچ رہیے، حکومت دا حصہ ہوندے ہوئیں مجبوراً ایجھیاں ڳالھیں کرݨیاں پوندیاں پئن ،ایوان اچ بدقسمتی نال میں توں علاوہ ایں ویلھے کوئی وزیر موجود کائںی۔ انہاں آکھیے اساں جمہوریت کیتے آپݨیاں جاناں ݙتن ، پارلیمان دی عزت کیتے تکلیفاں چاتن ۔ انہاں آکھیے ایں ویلھے ایوان اچ بجٹ تے بحث کرݨِ آلا کوئی کائنی ، ایجھے حالات اچ اتنا چنڳاں بجٹ پیش کیتا ڳئے ،زراعت پیشہ لوک حکومت کوں دعاواں ݙیندے پئن لیکن ایں تے اتھاں کوئی ڳالھ کرݨ کوں تیار کائنی ، انہاں آکھیے جیں ایں ایوان کوں عزت نی ݙتی ایکوں کتھائیں عزت کائنی ملی ،ایوان دی کارروائی کورم پورا تھیوݨ تے وزراء دی آمد تئیں ملتوی کیتی ونڄے ۔