اسلام آباد۔16جون (اے پی پی) وفاقی حکومت مہانگے تیل نال ٻݨݨ آلی بجلی دی بچت کیتے قومی سطح تے عادت بدلݨ دی لوڑھ تے زور ݙیندیں ہوئیں آکھیا جو ویلھے تے مارکیٹاں بند کر تے چار ہزار میگاواٹ تئیں بجلی بچائی ونڄ سڳدی اے۔ پی ٹی آئی حکومت ملک کوں معاشی طور تے تباہ کرݨ کیتے بارودی سرنگاں وچھائن جئیں پاروں حکومت اوکھے فیصلے کرݨ تے مجبور تھئی۔ تاریخ لکھی ویسی تاں اے سارا کجھ کھل تے سامھے امسی۔ عمران خان پی ایس ڈی پی دے تحت چھیکڑی چھی مہینے دے فنڈز کوں پٹرولیم مصنوعات دی سبسڈی دے طور تے استعمال کیتے۔ اگر اے سبسڈی ہک سال جاری رکھی تاں 1200 توں 1500 ارب روپے قومی خزانے تے ٻوجھ امدے۔ اتنا اساݙا سالانہ دفاعی بجٹ ہوندے۔ دعوے نال آکھدوں جو غیر ملکی سازش دے معاملے تے جوڈیشنل کمیشن وی بݨایا ونڄے تاں عمران خان اوں توں وی ٻھج ویسی۔ اے ڳالھیں وفاقی وزیر دفاع خواجہ محمد آصف ، وفاقی وزیر مواصلات مولانا اسعد محمود ، مشیر برائےامور کشمیر قمر الزمان کائرہ ، وزیر مملکت برائے پٹرولیم مصدق ملک خمیس کوں پی آئی ڈی اچ سانجھی پریس کانفرنس توں خطاب کریندیں ہوئیں آکھی۔ وفاقی وزیر دفاع خواجہ محمد آصف آکھیا جو گزریل رات تریجھی واری پٹرولیم مصنوعات دے نرخ ودھائن ایندی ݙو وجوہات ہن ہک پی ٹی آئی حکومت توں ملݨ آلی کھنڈر معاشی صورتحال اتے غلط پالیسیاں ہن، گزریل رات پٹرولیم مصنوعات دے نرخاں اچ ودھارے دے باوجود ہݨ وی متحدہ عرب امارات(یو اے ای ) جو پٹرولیم مصنوعات پیدا کرݨ دے نال نال برآمد وی کریندے اوں توں نرخ گھٹ ہن۔ آئی ایم ایف دی شرطاں پوری کرݨ دے سوا کوئی چارہ کائنا ہئی۔
