اپݨے دورے دے دوران عالمی برادری توں پاکستان کیتے وݙے پیمانے تے مدد دی اپیل کریساں ، سیکرٹری جنرل اقوام متحدہ

اقوام متحدہ ۔7ستمبر (اے پی پی):اقوام متحدہ دے سیکرٹری جنرل انتونیو گوتریش آکھیے جو او آپݨے دورہ پاکستان اچ عالمی برادری توں پاکستان کیتے وݙے پیمانے تے امداد دی اپیل کریسن ۔چینی خبررساں ادارے موجب اقوام متحدہ دے ہیڈ کوارٹر نیویارک اچ صحافیاں نال ڳالھ مہاڑ کریند ہوئیں انہاں آکھیے جو پاکستان دا ھک ترھائی حصہ سیلاب توں متاثر اے تے او پاکستانی عوام نال یکجہتی دا اظہار کرݨ تے عالمی برادری توں وݙے پیمانے تے مدد دی اپیل کرݨ کیتے پاکستان ویندے پئن کیوں جو ایں ویلھے پاکستان کوں عالمی برادری دی طرفوں بھرپور امداد دی لوڑھ اے، انہاں آکھیے جو او بین الا قوامی برادری توں پاکستان دے سیلاب متاثرہ لوکاں کیتے فوری امداد دی اپیل کریندے پئن انہاں آکھیے جو ایں ویلھے یوکرین جنگ تے زیادہ تو جہ ݙتی ویندی پئی اے کیوں جو لوک بھل ڳئن جو اصل جنگ تاں موسمیاتی تبدیلیاں نال نبݨݨ دی اے ، انہاں آکھیے جو پاکستان، چاڈ، اتے قرن افریقہ، جتھاں خشک سالی قحط دا باعث بݨدی پئی اے اتھاں ایں ویلھے ساریں توں وݙا خطرہ جیں نال نبݨݨ دی لوڑھ اے او موسمیاتی تبدیلیاں دے اثرات ہن۔ جیڑھی صورتحال اڄ پاکستان کوں درپیش اے کل کہیں ٻئے ملک کوں وی ایندے اوکھے حالات دا سامݨا تھی سڳدے ، انہاں آکھیے جو موسمیاتی تبدیلیاں ایں دور دا ساریں توں اہم مسئلہ اے تے ایں کوں عام مسئلہ سمجھ تے عام انداز نال حل کرݨ دی سوچ محض خود کشی ہوسی۔