سیلاب زدگان کیتے امریکی امدد اہم اے،امریکا دے نال تعلقات کوں مزید مستحکم بݨاوݨ کیتے پرعزم ہیسے ،وزیر اعظم شہباز شریف

اسلام آباد۔8ستمبر (اے پی پی)وزیر اعظم محمد شہباز شریف آکھیے جو امریکا دی طرفوں مسلسل تعاون، یکجہتی اتے سیلاب زدگان کیتے امداد ٻہوں اہمیت رکھیندی اے ، پاکستان سانجھی سکیورٹی، صحت، موسمیاتی تبدیلیاں ، تجارت اتے سرمایہ کاری دے شعبیں اچ پاک امریکا تعلقات کوں مزید مستحکم بݨاوݨ کیتے پرعزم اے۔ اے ڳالھ انہاں امریکی وزیر خارجہ دے سینئر پالیسی مشیر ڈیرک چولیٹ نال ڳالھ مہاڑ کریندے ہوئیں آکھی اے جنہاں خمیس کوں اتھاں انہاں دے نال ملاقات کیتی ۔ ملاقات اچ ڈیرک چولیٹ پاکستان اچ اڄوکے مینھ تے سیلاب توں تھیوݨ آلے قیمتی جاناں دے ضیان تے پاکستانی حکومت اتے عوام نال دلی تعزیت تے ہمدردی دا اظہار کیتے۔وزیر اعظم ڈیرک چولیٹ دا اوکھے ویلھے جݙاں جو پاکستان تاریخ دے ساریں توں تباہ کن سیلاب توں ݙوچار اے ، دورہ کرݨ تے شکریہ ادا کیتے۔وزیراعظم ݙسایا جو 3 کروڑ 30 لکھ توں ودھ پاکستانی ایں آفت توں ہݨ تئیں متاثر تھئن جݙاں جو 1,300 توں ودھ لوک لقمہ اجل بݨ چکن ۔ ایندے نال زراعت، مال ڈھور ، املاک، تے اہم انفراسٹرکچر دا وی ٻہوں ضیان تھئے ، وزیر اعظم آکھیے جو گندے پاݨی دے استعمال توں پیدا تھیوݨ آلی بیماریاں دا کھنڈݨ وی تشویشناک صورتحال اختیار کرسڳدے ۔ حکومت ایں تباہ کن صورتحال اچ ترجیحی بنیاداں تے ریسکیو و ریلیف آپریشن اچ پوری طرح مصروف اے۔وزیر اعظم ریسکیو تے ریلیف دے بعد سیلاب زدگان دی بحالی اتے انفراسٹرکچر و نجی املاک دی تعمیر نو دے وݙے چیلنجز تے وی روشنی پاتی ، انہاں آکھیے امریکا دی طرفوں مسلسل تعاون، یکجہتی تے سیلاب زدگان کیتے امدد ٻہوں اہمیت رکھیندی اے ، کیوں جو پاکستان تے امریکا دے سانجھی تعاون تے مبنی دیرینہ تعلقات دہائیاں تے محیط ہن ۔وزیراعظم پاک امریکا تعلقات دی اہمیتتے روشنی پیندے ہوئیں آکھیے جو پاکستان سکیورٹی، صحت، موسمیاتی تبدیلیاں ، تجارت اتے سرمایہ کاری دے شعبیں اچ انہاں تعلقات کوں گھاٹا کرݨ تے ودھاوݨ کیتے پرعزم اے ۔بائیڈن انتظامیہ دی طرفوں ڈیرک چولیٹ پیغام ݙیندے ہوئیں آکھیے جو امریکا ایں اڄوکے سیلاب توں پیدا تھیوݨ آلے چیلنج دے تناظر اچ پاکستان دے رلے کھڑا رہسی ، اہم مدد فراہم کریسی، اتے متاثرہ لوکاں دیاں زندگیاں دی بحالی تے متاثرہ کمیونٹیزدی تعمیر نو اچ مدد کریسی ۔