بین الاقوامی برادری دہشت گردی دے متاثرین دے حقوق دے تحفظ کوں امن اتے سلامتی دے ودھارے کیتے عالمی کوششاں دا بنیادی حصہ بݨاوے، وزیر خارجہ بلاول بھٹو زرداری

اسلام آباد۔9ستمبر (اے پی پی):وزیر خارجہ بلاول بھٹو زرداری بین الاقوامی برادری تے زور ݙتے جو دہشت گردی دے متاثرین دے حقوق دے تحفظ کوں امن تے سلامتی دے ودھارے کیتے عالمی کوششاں دا بنیادی حصہ بݨاوے۔ جمعہ کوں دفتر خارجہ موجب اے ڳالھ انہاں دہشت گردی دے متاثرین دی اقوام متحدہ دی پہلی عالمی کانگریس دے اعلیٰ سطح دے سیگمنٹ توں آپݨے خطاب اچ آکھی ۔ وزیر خارجہ عالمی برادری توں مطالبہ کیتے جو او جھیڑیں توں متاثرہ علاقیں اچ پیش چیلنجز نال نبݨݨ ویلھے متاثرین تے مبنی نقطہ نظر کوں ودھارا ݙیون ۔ وزیر خارجہ پوری دنیا اچ دہشت گردی دے متاثرین نال یکجہتی دا اظہار کریندے ہوئیں بھارت دے غیر قانونی زیرتسلط جموں و کشمیر اتے فلسطین دے مظلوم لوکاں کوں خصوصی خراج عقیدت پیش کیتے۔ انہاں خاص طور تے غیر ملکی قبضے دے معاملات اچ ریاستی دہشت گردی دا مقابلہ کرݨ دی لوڑھ تے زور ݙتے ۔ بلاول بھٹو زرداری دہشت گردی دے خلاف جنگ اچ پاکستان دیاں قربانیاں کوں اجاگر کریندے ہوئیں آکھیے جو پاکستان دہشت گردی توں ساریں توں ودھ متاثر تھئے جتھاں 80 ہزار توں ودھ لوک جاں بحق اتے 150 ارب ڈالر توں ودھ دا معاشی ضیان تھئے ۔ وزیر خارجہ آکھیے جو پاکستان ہر قسم دی دہشت گردی دی مذمت کریندے جیں اچ اسلامو فوبیا، نسلی محرک اتے ریاستی سرپرستی اچ دہشت گردی وی شامل اے۔ وزیر خارجہ نویں تے ابھردے ہوئے خطرے کوں سامݨے رکھیندے ہئیں دہشت گردی دی متفقہ تعریف تیار کرݨ دی لوڑھ تے زور ݙتا ۔ انہاں آکھیے جو دہشت گردی مکاوݨ صرف ایں دے بنیادی اسباب کوں حل کرتے ہی کیتا ونڄ سڳدے ۔ گلوبل کانگریس ھک ݙو ݙینھ وار اعلیٰ سطحی تقریب اے جیں دا اہتمام اقوام متحدہ دے دفتر انسداد دہشت گردی (یو ای او سی ٹی) کریندا پئے ۔ کانگریس دا مقصد دہشت گردی دے متاثرین دے حقوق اتے ضرورتاں بارے بیداری پیدا کرݨ تے ایں مسئلے تے ڳالھ مہاڑ کوں ودھاوݨا اے ۔ تقریب اچ وزارتی سطح تے ٻہوں سارے ملکاں شرکت کیتی۔