اڄوکے سیلاب نال پاکستان دے مجموعی انفراسٹرکچر ،ذریعہ معاش سودھے مختلف چیلنجز ہن، اساں جلدی انہاں چیلنجز نال نبڑ ڳھنسوں۔ وفاقی وزیر احسن اقبال

اسلام آباد۔9ستمبر (اے پی پی) وفاقی وزیر منصوبہ بندی ،ترقی ، اصلاحات تے خصوصی اقدامات تے ڈپٹی چیئرمین این ایف آر سی سی احسن اقبال آکھیا جو اڄوکے سیلاب نال پاکستان دے مجموعی انفراسٹرکچر ،ذریعہ معاش سودھے مختلف چیلنجز ہن، اساں جلدی انہاں چیلنجز نال نبڑ ڳھنسوں، عالمی برادری اتے دوست ملکاں دے تعاون نال اساں جلدی انہاں چیلنجز نال نبڑ ڳھنسوں۔ وزیراعظم شہباز شریف دے دورہ اقوام متحدہ توں پہلے ملک اچ سیلاب نال تھیوݨ آلے نقصانات دا ابتدائی تخمینہ لیسوں۔ اڄوکے چھل پاروں ملک دا ہک تہائی حصہ پاݨی اچ ٻݙیا ہوئیے۔ 2005 دے زلزلے اتے 2010 دے چھل توں ودھ ایں سیلاب اچ نقصان تھین۔ سندھ دا ٻہوں سارا حصہ اڄاں وی پاݨی اچ ٻݙیا ہئے۔ ٹریک پاݨی اچ ٻݙݨ پاروں اسلام آباد توں کراچی ریلوے آپریشن معطل اے۔ او جمعے کوں نیشنل فلڈر ریسپانس کوآرڈنیشن سینٹر (این ایف آر سی سی) اچ وزیراعظم شہباز شریف اتے اقوام متحدہ دے سیکرٹری جنرل انتونیو گوتیرس دے دورہ دے موقع تے بریفنگ ݙیندے پئے ہن۔ وفاقی کابینہ دے اراکین ، نیشنل کوآرڈینیٹر این ایف آر سی سی میجر جنرل ظفر اقبال ایں موقع تے موجود ہن۔ وفاقی وزیر احسن اقبال اقوام متحدہ دے سیکرٹری جنرل دے دورہ پاکستان دا خیر مقدم کریندیں ہوئیں آکھیا جو پاکستان دے ایں اوکھے حالات اچ عالمی برادری کوں تساݙے سنیھے نال اساکوں حوصلہ ملیے۔ انہاں آکھیا جو ایں ویلھے اساں موسمیاتی ڈیزاسٹر نال نبڑدے پیوں۔ 2010 سیلاب اچ 20 ملین لوک متاثر تھیے ہن۔ اڄوکے چھل اچ 33 ملین لوک متاثر تھین۔ دنیا دے کہیں ملک اچ اتنا وݙا سانحہ نی تھیا۔ انہاں آکھیا جو اقوام متحدہ ، امریکہ ،چین، متحدہ عرب امارات سمیت دوست ملک ریلیف کماں اچ مدد کریندے پئن جئیں تے اساں شکریہ اداکریندوں۔