وزیراعظم محمد شہباز شریف نال اقوام متحدہ دے سیکرٹری جنرل انتونیو گوتریس دی ملاقات

اسلام آباد۔9ستمبر(اے پی پی)وزیراعظم محمد شہباز شریف نال اقوام متحدہ دے سیکرٹری جنرل انتونیو گوتریس ملین۔ ایں موقع تے وفاقی کابینہ دے اراکین وی موجود ہن۔ وزیراعظم سیکرٹری جنرل کوں ݙسایا جو پاکستان کوں عام حالات توں ودھ چھل دا سامݨا اے، موسمیاتی تبدیلی ہک وݙی آفت ڳھدی آندی اے، حکومت اقوام متحدہ دے اداراں، بین الاقوامی برادری اتے سماجی تنظیماں دے ڳانݙھے نال 3 کروڑ 30 لکھ توںو دھ متاثرین تئیں پڄݨ کیتے وݙے پیمانے تے امدادی کارروائیاں کریندی پئی اے۔ وزیراعظم پاکستان دے فلڈ رسپانس پلان دی فنڈنگ کیتے اقوام متحدہ دی 160 ملین ڈالر دی ”فلیش اپیل” سودھا بین الاقوامی امداد سانڳے سیکرٹری جنرل دی بھرپور حمایت تے شکریہ ادا کیتے۔ وزیراعظم آکھیا جو ”موسمیاتی انصاف” دے جذبے سانڳے پاکستان عالمی برادری خصوصاً صنعتی ممالک ولوں ایں موسمیاتی آفت نال نبڑݨ اتے بحالی کیتے تعاون دا حقدار اے۔ انہاں سیلاب متاثرہ آبادی دی بحالی دے مرحلے اتے سیلاب نال تباہ حال علاقیاں دی تعمیرنو کیتے پاکستان دے منصوبیاں تے وی الایا۔ سیکرٹری جنرل آکھیا جو پاکستان اچ سیلاب زدگان دی امداد و بحالی سودھا موسمیاتی تبدیلی دے مسئلے کوں تیکھے، سنجیدگی اتے ذمہ داریاں نال حل کرݨ دی لوڑھ اے۔ سیکرٹری جنرل نیشنل فلڈ رسپانس اینڈ کوآرڈینیشن سینٹر اچ بریفنگ وی ڳھدی۔