این ایف آر سی سی داسردیاں توں پہلے اقدامات کوں یقینی بݨاوݨ کیتے جنگی بنیاداں تے مشترکہ سروے دی لوڑھ تے زور

اسلام آباد۔19ستمبر (اے پی پی):نیشنل فلڈ ریسپانس کوآرڈینیشن سینٹر’’این ایف آر سی سی ‘‘ اچ سیلاب متاثرہ علاقیں اچ صورتحال دا جائزہ گھنݨ کیتے اہم اجلاس منعقد تھئے ۔سنوار کوں منعقدہ اجلاس اچ فورم کوں تازہ ترین صورتحال تے سیلاب دے انسانی جاناں، مویشیاں تے انفراسٹرکچر تے پووݨ آلے اثرات بارے اچ تفصیلی بریفنگ ݙتی ڳئی ۔ نیشنل کوآرڈینیٹر فورم کوں سندھ دے سیلاب توں متاثرہ علاقیں دے آپݨے اڄوکے دورے تے سیلاب توں تھیوݨ آلے ضیان دے فضائی جائزے سودھے اہم امور متعلق ݙسایا ۔ فورم ایں ڳالھ تے اتفاق کیتے جو اڄوکے سیلاب اچ تھیوݨ آلے ضیان دی ماضی دی ساری قدرتی آفات دے ضیاں توں کئی گنازیادہ اے۔اڄوکے مینھ توں سندھ، بلوچستام،پنجاب دے علاقے شدید متاثر تھئن ۔ فورم کوں ݙسایا ڳیا جو 33 ملین لوک متاثر ہن جنہاں اچ 16 ملین ٻال 3.4 ملین چھوہر شامل ہن انہاں دی زندگی بچاوݨ کیتے وختی مدد دی لوڑھ اے، مینھ تے سیلاب توں 1500 لوک جاں بحق تھئن جنہاں اچوں 500 توں ودھ ٻال وی شامل ہن ۔ فورم کوں اے وی ݙسایا ڳئے جو متاثرہ لوکاں تے کھاݨے دے وی خصوصی توجہ ݙیوݨ دی لوڑھاے خاص طور تے ٻالاں دی خوراک اتے حاملہ خواتین کیتے سپلیمنٹری خوراک کیوں جو غذائیت دی کمی دی وجہ توں صحت دے مسئلیں دا خطرہ اے ۔