پوری دنیا اچ تعلیم دا شعبہ شدید بحران دا شکار اے ، یو این سیکرٹری جنرل دا ایجوکیشن سمٹ توں خطاب، وزیر مملکت حنا ربانی کھر دا چھوہریں دی تعلیم دے اقدامات تے زور

اقوام متحدہ۔20ستمبر (اے پی پی):اقوام متحدہ دے سیکرٹری جنرل انتونیو گوتیرس خبر دار کیتے جو پوری دنیا اچ تعلیم دا شعبہ شدید بحران دا شکار اے تے ایں بحران نال نبݨݨ کیتے ایں شعبہ کیتے مطلوبہ فنڈز مختص کرݨ تے ایں توں سرمایہ کاری کوں سکھݨ دے عمل دا حصہ بݨایا ونڄݨ ضروری اے ۔ اقوام متحدہ دے زیر اہتمام ترائے ݙینھ وار ایجوکیشن سمٹ دے اختتامی سیشن توں خطاب اچ انہاں آکھیے جو اساں سارے اڄ جیڑھا کجھ وی ہیسے تعلیم دی وجہ توں ہیسے۔ انہاں آکھیے جو زندگیاں، معیشتاں اتے معاشریں کوں بدلݨ کیتے اساکوں موجودہ تعلیمی نظام کوں بدلݨا ہوسی ، ایں موقع تے پاکستان دی وزیر مملکت خارجہ امور حنا ربانی کھر آپݨے جی۔77 اتے چین دی نمائندگی کریندے ہوئیں جامع، معیاری اتے سارے ، خاص طور تے چھوہریں کیتے برابر دی تعلیم دے حوالے نال نتیجہ خیز اقدامات دی لوڑھ تے زور ݙتا۔ نوبل انعام یافتہ پاکستانی تے یو این میسنجر فار پیس ملالہ یوسفزئی آپݨے خطاب اچ پوری دنیا اچ سکولاں کوں چھوہریں کیتے محفوظ بݨاوݨ تے ہر ھک ٻال کیتے علم حاصل کرݨ دے حق دے تحفط دا مطالبہ کیتے تاں جو ٻالاں کیتے مستقبل کوں محفوظ بݨایا ونڄ سڳے ۔سربراہ اجلاس دے چھیکڑ تے جاری اعلامیہ اچ آکھیا ڳئے جو ایں اجلاس اچ شریک 130 ملکاں دے رہنماواں تعلیمی نظام دے احیاتے تعلیم دے شعبہ کوں پیش آندے بحران نال نبݨݨ دی کوشش تکھا کرݨ دا عزم کیتے ۔ اے عزم دنیا دے 115 ملکاں دے رہنماواں، اساتذہ، طلبہ اتے سول سوسائٹی دے نمائندیں دی سفارشات کوں سامݨے رکھ تے کیتا ڳئے ۔اقوام متحدہ دے سربراہ ایں موقع تے آپݨے خطاب اچ مزید آکھیے جو بہترین وسائل تے سکولاں، یونیورسٹیاں تئیں رسائی رکھݨ آلے امیر لوک بہترین ملازمتاں حاصل کر گھندن جݙاں جو غریب طبقہ خاص طور تے چھوہریں ، بے گھر لوک تے معذور طلبہ کوں تعلیمی قابلیت حاصل کرݨ اچ ٻہوں ساریاں رکاوٹاں دا سامݨا اے جیڑھی انہاں دیاں زندگیاں اچ تبدیلی گھن آسڳدی اے ۔