پاکستان ماحولیاتی بحران دے اڳو فرنٹ لائن اچ کھڑے، ڄڳ کوں فوری فیصلے ڳھنݨے ہوسن، وفاقی وزیر شیری رحمان دا کلائمیٹ اینڈ ڈویلپمنٹ وزارتی اجلاس نال خطاب

نیویارک ۔21ستمبر(اے پی پی)وفاقی وزیر برائے ماحولیاتی تبدیلی سینیٹر شیری رحمان نیویارک اچ کلائمیٹ اینڈ ڈویلپمنٹ وزارتی اجلاس اچ پاکستان دی نمائندگی کیتی اتے اقوام متحدہ دی جنرل اسمبلی دے موقع تے برطانیہ اتے روانڈا ولوں اجلاس اچ خطاب وی کیتے۔ انہاں آکھیا جو پاکستان ماحولیاتی بحران دے اڳو فرنٹ لائن اچ کھڑے، ڄڳ کوں بحث مباحثے توں نکل تے فیصلے کرݨے ہوسن، گرین ہائوس گیسز اچ حصہ نا ہووݨ دے باوجود پاکستان کوں تھیوݨ آلے نقصان دا کوئی وی ازالہ نئیں کرسڳدا، پاکستان اچ ریکارڈ بارشاں دے بعد تاریخی سیلاب غیرمعمولی تباہی مچائی اے، بارشاں اتے سیلاب نال مختلف واقعات اچ 15 سو توں ودھ لوک موئن، 12,860 زخمی تھین، 3 کروڑ 30 لکھ توںو دھ لوک متاثر ہین اتے 20 لکھ توں ودھ گھراں کوں نقصان پڄیے، اتے ہکے ویلھے ہک ترہائی پاکستان سیلاب وات آیا ہویا ہا۔ انہاں آکھیا جو پاݨی نکلݨ اچ کئی مہینے لڳ ویسن، ایں دوران خوراک دی کمی، شیلٹر دے مسائل اتے وبائی امراض وݙا چیلنج ہین، انفراسٹرکچر دی بحالی وی وݙا مسئلہ اے۔