ماحولیاتی تبدیلی دے اثرات پوری دنیا کوں اپݨی وکیڑاچ گھن ڳھدا ،سینیٹر شیری رحمان

اسلام آباد۔28ستمبر (اے پی پی):وفاقی وزیر ماحولیاتی تبدیلی سینیٹر شیری رحمان آکھیے جو ماحولیاتی تبدیلی دے اثرات پوری دنیا کوں آپݨی وکیڑ اچ گھن ڳھدے ، ایں تناظر اچ کساد بازاری دے پاکستان سودھے عالمی جنوب تے خراب اثرات پوسن ۔ بدھ کوں ٹویٹ اچ انہاں آکھیے جو ورلڈ ٹریڈ آرگنائزیشن دنیا کوں عالمی کساد بازاری (رسیشن) دے حوالے نال خبردار کیتے، ماحولیاتی تبدیلی اتے جاری عالمی تصادم کساد بازاری دا سبب بݨدے پئن ، پاکستان کوں پہلے ہی مینھ تے سیلاب دی وجہ توں خوراک اتے رسائی دے شدید مسئلیں دا سامݨا اے ۔ شیری رحمان آکھیے سیلاب دی وجہ توں ساݙے بنیادی ڈھانچے سودھے زراعت اتے آمد و رفت دے نظام کوں ضیان تھئے ، 46 لکھ ایکڑ رقبے تے کھڑیاں فصلاں کوں ضیان تھئے، ہݨ تئیں دے تخمینے دے مطابق 481 ارب روپے دیاں فصلاں تے اجناس تباہ تھی چکن ، 13 ہزار کلومیٹر توں ودھ سٹرکاں تے 410 پلاں کوں ضیان پڄے۔ انہاں آکھیے جو آمدورفت دے نظام اتے خوراک دے بحران دی وجہ توں بٻہوں ساریاں دشواریاں پیش آ سڳدن ۔