پاک فضائیہ دی طرفوں متاثرین سیلاب دی طبی امداد تے بحالی دا کم جاری

کراچی۔30ستمبر (اے پی پی):پاک فضائیہ دی طرفوں خیبرپختونخوا، سندھ، بلوچستان اتے جنوبی پنجاب دے سیلاب متاثرہ علاقیں اچ طبی امداد، ریلیف تے بحالی دیاں سرگرمیاں چنڳے طریقے نال جاری ہن ۔ پاک فضائیہ دی طرفوں جاری اعلامیہ موجب پاک فضائیہ اپݨے میڈیکل کیمپاں تے موبائل میڈیکل ٹیماں دے ذریعے سیلاب زدگان کوں ضروری طبی امداد ݙیندی پئی اے۔ پاک فضائیہ دے میڈیکل لیب کلیکشن پوائنٹس وی سیلاب متاثرین اچ پاݨی توں پیدا تھیوݨ آلیاں بیماریاں دی تشخیص اچ سرگرم عمل ہن۔پاک فضائیہ دے اہلکاراں ٹرانسپورٹ فلیٹ، ہیلی کاپٹراں تے کشتیاں دے ذریعے سیلاب زدہ علاقیں اچ پتھے مقامی لوکاں کوں کڈھݨ اچ مدد کیتی تے انہاں کوں محفوظ جاہ تے منتقل کیتے۔ پاک فضائیہ دے اہلکاراں سیلاب توں متاثرہ لوکاں اچ خشک راشن، پکیا ہوا کھاݨا، پیوݨ دا صاف پاݨی اتے ٻیاں چیزاں ونڈین۔ گزریل چووی گھنٹے اچ پاک فضائیہ ضرورت مند خانداناں اچ 18ہزار 20 پکے ہوئے کھاݨے دے پیکٹ، 340 پاݨی دیاں بوتلاں تے 560 خشک راشن دے پیکٹ ونڈیے۔ مزید اے جو مفت خوراک تے رہائش ݙیوݨ توں علاوہ پاک فضائیہ دیاں میڈیکل ٹیماں 878 مریضاں دا مفت طبی معائنہ وی کیتے۔