سیلاب زدگان کیتے 133 پروازاں امدادی سامان گھن تے پاکستان آئن ، دفتر خارجہ

اسلام آباد۔30ستمبر (اے پی پی):سیلاب متاثرین کیتے ٻاہرلے ملکاں توں امدادی پروازاں دی آمد دا سلسلہ جاری اے، ہݨ تئیں وکھو وکھ ملکاں توں 133 پروازاں متاثرین کیتے امدادی سامان گھن تے پاکستان پڄن ۔ دفتر خارجہ دے ترجمان موجب سیلاب زدگان کیتے متحدہ عرب امارات توں ہݨ تئیں مجموعی طور تے41، ترکیہ توں14، چین توں 4، ازبکستان توں ھک ، قطرتوں 4، فرانس توں ھک ، یونیسیف دی 3، اقوام متحدہ دے پناہ گزیناں دے ادارہ ( یو این ایچ سی آر) دیاں 14پروازاں ، ترکمانستان دی ھک ، اردن دی ھک ، عالمی ادارہ خوراک دی ترائے، امریکا دی 21، برطانیہ دی ھک ، نیپال دی ھک ، اومان دی 8، روس، یونان اتے اٹلی دی ھک ھک اتے سعودی عرب دیاں 10 پروازاں امدادی سامان گھن تے پاکستان آئن ۔ انڈونیشیا توں وی ݙو پروازاں سیلاب زدگان کیتے امدادی سامان گھن تے ہݨ تئیں پاکستان پڄن۔ امدادی پروازاں دے علاوہ ایران توں 100 ٹن امدادی سامان ٹرکاں دے ذریعے پاکستان پڄے۔ سیلاب زدگان کیتے ترکیہ دی طرفوں ترائے ریل گاݙیاں تے ݙو ٹرکاں تے مشتمل امدادی سامان پاکستان بھیجا ڳئے۔ پاکستان دے سیلاب متاثرین کیتے تاجکستان توں 87 ٹرکاں دے ذریعے امدادی سامان بھیجا ڳئے۔ متحدہ عرب امارات اتے اومان توں امدادی سامان گھن تے ھک ھک بحری جہاز وی پاکستان پجے۔