اسلام آباد۔4اکتوبر (اے پی پی) صدرڈاکٹرعارف علوی دی وزیراعظم، وزراء، ارکان پارلیمنٹ، گورنرز اتے میڈیا کوں لکھیے ڳئے خطوط دے ذریعے چھاتی دے کینسر بارے آگاہی مہم اچ فعال شرکت دی دعوت ݙیندے ہوئیں تریمتاں اچ مہلک مرض متعلق از خود معائنہ تے وختی تشخیص دی اہمیت کوں اجاگر کرݨ اچ تعاون دی اپیل کیتی اے ۔ صدر انہاں کوں اڄوکے سال چھاتی دے کینسر متعلق آگاہی مہم اچ فعال اتے رضاکارانہ شراکت دار بݨݨ دی دعوت ݙتی جیں اچ پسماندہ طبقے دیاں تریمتاں تے سیلاب زدہ علاقیں تے خاص طور تے توجہ ݙتی ویسی جتھاں تریمتاں ساریں توں ودھ متاثر تھئن ۔ صدر مملکت ایں ڳالھ تے تشویش کیتی اے جو پاکستان اچ ہر سال چھاتی دے کینسر دے تقریباً ھک لکھ نویں کیس رپورٹ تھیندن ، جنہاں اچوں ادھ تریمتاں تاخیر نال تشخیص پاروں موت دے منہ اچ چلیاں ویندن ۔انہاں مزید آکھیے جو انہاں قیمتی جاناں اچوں 98 فیصد کوں ازخود معائنہ اتے وختی تشخیص بارے آگاہی پیدا کرتے بچایا ونڄ سڳدے۔صدر مملکت ݙسایا جو خاتون اول بیگم ثمینہ عارف علوی دی قیادت اچ گزریل چار سال دی بریسٹ کینسر آگاہی مہم دے نتیجے اچ ہسپتالاں اچ چھاتی دے کینسر دے کیسز دی ابتدائی رپورٹنگ اچ ودھارا تھئے ۔ نامور صحافیاں دے ناویں آپݨے خطوط اچ انہاں گزریل سال چار اچ مسلسل تعاون تے انہاں دا شکریہ ادا کیتے تے آکھیے جو انہاں دے قابل قدر تعاون تے فعال شراکت دے بغیر مہم دی کامیابی ممکن کائناں ہئی ، انہاں میڈیا پرسنز تے وی زور ݙتا جو او اڄوکے سال وی آپݨا فعال کردار ادا کرن تاں جو ٹارگٹ خواتین کوں نیوز بلیٹنز، خصوصی رپورٹس، ڈرامیں، مارننگ شوز، مضامین، کالم تے اداریے دے ذریعے ازخود معائنہ تے جلد تشخیص دی بنیادی اہمیت بارے آگاہی ݙتی ونڄ سڳے۔
