اسلام آباد۔6اکتوبر (اے پی پی):صدر مملکت ڈاکٹر عارف علوی قومی راز نی کھلݨے چاہیدے ، آڈیو لیکس دی تحقیقات تھیوݨی چاہیدی ، صاف شفاف انتخابات کیتے الیکٹرانک ووٹنگ مشین توں انتخابی عمل تے تحفظات دور کیتے ونڄ سڳدن ، ٻاہرلے ملک 30 لکھ پاکستانیاں کوں ووٹ دا حق ملݨا چاہیدے ، پاکستان ھک پرامن، مستحکم اتے خوشحال افغانستان چاہندے، کشمیری عوام دی جدوجہد آزادی دی حمایت جاری رکھیسوں ۔ اے ڳالھ انہاں چوتھے پارلیمانی سال دی مکݨ تے پنجویں پارلیمانی سال دے شروعات تے پارلیمنٹ دے مشترکہ اجلاس نال خطاب اچ آکھی ۔ صدر مملکت آکھیے جو اللہ ساکوں ھک بہترین موقع ݙتے جو اساں قائد اعظم دے اصولاں دے مطابق ھک نویں ریاست دے معمار بݨوں اتے کوئی نہ آکھ سڳے جو اساں آپݨی ذمے داری نسے نبھا سڳیے۔ آزادی اوکھیں ملدی اے بھل جمہوریت کوں ودھدا رہݨا چاہیدے ۔دعا اے جو ساکوں مسئلیں توں تکھے نجات ملے ساݙا ملک ٻیا تکڑا تھیوے۔ صدر مملکت آکھیے جو ایں واری ودھ سیلاب پاروں ھک خوفناک سیلاب دا سامݨا کرݨا پئے جیں دے نال ساݙا وݙا جانی اتے مالی ضیان تھئے ۔ صدر آکھیے جو سیلاب متاثرین دی امداد اتے بحالی کیتے پوری قوم ساریاں حکومتاں پاک فوج سودھا ملکی اداریں اتے عالمی تنظیماں دے شکر گزار ہیسے جو او ایں اوکھ اچ ساݙے ٻانہہ ٻیل بݨین۔ انہاں آکھیے جو بے نظیر انکم سپورٹ پروگرام سیلاب متاثرین کیتے ھک نعمت ثابت تھئے جݙاں جو اقوام متحدہ جتنا پاکستان دا ہتھ ونڈائے او قابل تعریف اے جیندے نال جگ پاکستان دی امداد سانگے متوجہ تھئے اتے سیلاب متاثرین کوں ھک منظم انداز اچ ریلف ݙیوݨ ممکن تھئے ۔صدر مملکت آکھیے جو موسمیاتی تبدیلی اتے عالمی درجہ حرارت ھک وݙا مسئلہ اے جیندا بھوڳ پاکستان کوں بھوڳݨا پئے ۔ سیلاب نال نقصانات دا اندازہ لایا ویندا پئے بھل ایں اوکھ اچوں نکلݨ کیتے ھک وݙے عرصے تئیں جدوجہد دی لوڑھ ہوسی ، صدر مملکت آکھیے جو موسمیاتی تبدیلیاں نال ممکنہ خطرات نال نبݨݨ کیتے نینگراں کوں متحرک کرݨ اتے تربیت ݙیوݨ دی لوڑھ اے جو انہاں کوں طبی امداد خون دا عطیہ ݙیوݨ سودھا ٻئے اقدامات کیتے تیار کریجے۔ساکوں سیلاب نال تباہ شدہ زرعی شعبے دی بحالی کیتے ہنگامی اقدامات کرݨے ہوسن تاں جو خوراک دی کمی اتے پیداوار گھٹݨ دے مسئلیں تے قابو پاتا ونڄ سڳے۔ایں سانڳے کساناں کیتے مراعات پاݨی دے ذخائر کوں مربوط بݨاوݨ نویں ڈیم بݨاوݨ تے توجہ ݙیوݨی ہوسی ۔اتے زرعی شعبے کوں ٹیکنالوجی نال ترقی دی راہ تے سٹݨا ہوسی ۔صدر مملکت آکھیے دہشت گردی تے قابو پاوݨ پاکستان دی ھک وݙی کامیابی اے 40 لکھ افغان پناہ گزیناں دی مہمان نوازی تے ساکوں ماݨ ہووݨا چاہیدے ۔ پاکستان جیویں کورونا دی وبا تے قابو پاتے او جگ کیتے ھک مثال اے ۔ساکوں آپݨے انسانی وسائل خاص کر نینگراں دی ودھ تعداد توں فیدہ چاوݨا ہوسی جیندے نال پاکستان دی قسمت بدل سڳدی اے ۔تعلیم تے توجہ ترجیح ہووݨی چاہیدی اے آپݨی نسل کوں ہنر مندی اتے روزگار دے مواقع ݙیوݨے ہوسن ۔
