عمران خان دا آڈیو لیک دی سازش دا بیانیہ بے نقاب تھی چکیے، پنجاب اچ آئینی تبدیلی تے کوئی اعتراض نہ ہوسی، وزیر اعظم شہباز شریف

لاہور۔8اکتوبر(اے پی پی)وزیر اعظم شہباز شریف آکھیے جو عمران خان دا آڈیو لیک دی سازش دا بیانیہ ‘ساراڈرامہ اتے کور بے نقاب تھی چکیے، جیکر پنجاب اچ مرکز آلی کار آئینی طور تے کوئی سیاسی تبدیلی آند اے تاں کہیں کوں اعتراض نہ ہوسی۔ لاہور اچ سپیشل سینٹرل عدالت اچ پیشی دے بعد میڈیا نال الیندے انہاں آکھیا جو ہر کہیں کوں قانون دا احترام کرݨا چاہیدے، اڄ وی قانون دا احترام کریندے ہوئے عدالت دے سامݨے پیش تھیاں، نیب عدالت نوازشریف کوں کئی واری سݙیے او عدالت پیش تھیندے ہن، انہاں این آر او نئیں منڳیا۔ انہاں آکھیا جو میں عمران خان ڄھیاں کوڑا، فراڈیا اتے دھوکے باز نئیں ݙٹھا، آڈیو لیک اچ عمران خان منیے جو میں 5 ڄݨے ڳھدن، عمران نیازی وزیر اعظم ہاوس اچ ٻولی لائی اے ووٹ دی منݙی لڳی اے، انہاں 5 ووٹاں کیتے کتھو پیسہ آئے؟ عمران خان آپ آہدے ہن جیڑھا خود ضمیر وچیسی ایندے ٻالاں نال کوئی رشتے نا کریسی۔ انہاں آکھیا جو عمران خان پاروں امریکا سودھا سنڳتی ملکاں نال تعلقات متاثر تھین، اینڄھے رویے نال پاکستان کوں اوکھ آئن، اساں پاکستان کوں بچاوݨے۔ انہاں آکھیا جو عمران خان دا مریم نواز تے این آر او دا الزام قابل مذمت اے، مریم نواز میرٹ تے بری تھئی اے، پارٹی قیادت کوں بدترین سیاسی انتقام دا نشانہ ٻݨایا ڳئے، چیئرمین پی ٹی آئی کوں قوم کوں ولدا ݙیوݨا ہوسی جو انہاں اپݨے دور اچ کیویں این آر او ݙتن۔