شیخوپورہ: جنونی قاتل ستے 8 ڄݨے مار ڳھتین، ملزم گرفتار

اسلام آباد۔9اکتوبر(اے پی پی)شیخوپورہ دی وستی ہاچر اچ کہاڑی اتے لوہے دے راڈ نال قتل دے واقعے اچ 8 ڄݨے مار ݙتے ڳین اتے پولیس سفاک ملزم کوں نپ ڳھدے۔ ملزم فیض رسول سکول ٹیچر اے۔ ملزم ایہو ڄھیں حملے اچ پہلے وی پکڑیا ڳیا ہا ٻھل ذہنی بیمار قرار ݙیوݨ پاروں چھوڑ ݙتا ڳیا ہا۔ ݙسایا ڳئے جو 8 مقتولین دیاں لاشاں مختلف گھراں، سڑک کنارے اتے ہاچر وستی دے نیڑے کھیتاں اچوں ملین۔ مرݨ آلیاں دی سنڄاݨ 20 سالہ دلاور، 25 سالہ اسد علی، 25 سالہ فیصل، 55 سالہ اکرم، 40 سالہ تنویر، 19 سالہ شہروز، 19 سالہ عمیر اتے 70 سالہ سرفراز دے ناں نال تھئی اے۔ مقتولین کوں ستے ہوئے ماریا ڳئے۔ کانسٹیبل ملزم کوں موٹر سائیکل رت نال ٻھریا ݙیکھ تے پیچھا کیتے اتے 4 پنڄ کلومیٹر اڳو ونڄ تے پکڑیے۔ نارنگ پولیس فلنگ اسٹیشن دے ملازم اخلاق احمد دی شکایت تے ملزم دے خلاف قتل دا مقدمہ درج کرڳھدے۔