جشن عید میلاد النبیﷺ عقیدت تے احترام نال منایا ڳیا، ہر پاسے چراغاں، فضا درود و سلام نال گونجدی رہی

اسلام آباد۔9اکتوبر(اے پی پی)پورے ملک اچ جشن آمد رسول صلی اللہ علیہ وآلہ وسلم عقیدت و احترام نال منایا ڳئے۔ ایں سانڳے ہر چھوٹے وݙے شہر، گلی محلیاں، سڑکاں، چوک بازاراں، مسیتاں، گھراں اتے عمرتاں کوں رنگ برنگی جھنݙیاں نال سڄایا ڳیا ہا۔ ٹمٹاندیاں ساویاں پیلیاں اتے رتیاں بتیاں وی لایاں ڳیاں ہن اتے ہر پاسے چراغاں دا منظر ہا۔ فخا دورد پاک نال گونجدی رہی۔ پیارے نبی صلی اللہ علیہ وآلہ وسلم دے جیوݨ، فلسفہ حیات اتے دین اسلام دی آبیاری کیتے ہک واضح اتے شفاف رستے تے عمل سانڳے سیمینار، کانفرنساں اتے مباحچے کیتے ڳین، ڄݙاں جو شہر شہر جشن عید میلاد النبی صلی اللہ علیہ وآلہ وسلم دے جلوس وی کݙھیے ڳین۔ ݙینھ ابھردے وفاقی دارالحکومت اچ 31 اتے صوبائی دارالحکومتاں اچ 21 ، 21 توپاں دکی سلامی ݙتی ڳئی۔ عید میلاد النبیﷺ سانڳے ملک اچ محافل سماع وی تھین۔ 12 ربیع الاول تے امن و امان سانڳے مختلف شہراں اچ موٹرسائیکل دی ڈبل سواری تے پابندی سودھا جلوساں دی سکیورٹی کیتے خصوصی انتظامات ہن۔ پنجاب اتے بلوچستان دے کڄھ شہراں سودھا کراچی اچ وی جلوساں دے روٹ تے موبائل فون سروس وی بند رہی۔