نواز شریف نومبر دے آخر یا دسمبر دے شروع تئیں پاکستان اچ ہوسن ، حنیف عباسی دی متاثرین سیلاب کیتے امدادی سامان خیبر پختونخوا روانہ کرݨ دے موقع تے ڳالھ مہاڑ

راولپنڈی ۔11اکتوبر (اے پی پی):مسلم لیگ (ن )دے رہنما حنیف عباسی آکھیے جو میاں نواز شریف نومبر دے آخر یا دسمبر دے شروع تئیں پاکستانی عوام دے درمیان موجود ہوسن ، روپیہ مستحکم تھیندا پئے ،ڈالر وختی 200 توں تلے آویسی ، سیلاب توں متاثرہ ساڈھے ترائے کروڑ توں ودھ لوکاں کوں آُݨے گھراں اچ آباد کریسوں ،گزریل چار سال اچ صرف انتقام دی سیاست کوں پروان چڑھایا ڳئے ، وزیراعظم شہباز شریف دی مختلف ملکاں دے دورے کرݨ نال خارجہ پالیسی بہتری آلے پاسے ٹردی پئی اے ، کھیݙ دے میداناں کوں سیاسی جلسیں کیتے استعمال کرݨ مناسب کائنی ،پنجاب اچ جلدی تبدیلی آسی ، چار مہینے توں پنجاب اسمبلی دا اجلاس ختم نی کیتا ویندا پیا کیوں جو پرویز الہیٰ کوں پتہ اے جو انہاں کوں اعتماد دا ووٹ گھنݨا پوسی ۔ متاثرین سیلاب دی امداد کیتے پاکستان مسلم لیگ( ن ) دی طرفوں خیبر پختونخوا دے متاثرین کیتے امدادی سامان دی روانگی دے موقع تے میڈیا نال ڳالھ مہاڑ کریندے ہوئیں انہاں آکھیے جو وزیراعظم شہباز شریف دی ہدایت تے سیلاب زدگان دی امداد کیتے پاکستان مسلم لیگ( ن) راولپنڈی سٹی دی طرفوں پارٹی دے قومی و صوبائی اسمبلی دے ٹکٹ ہولڈرز ، خواتین ونگ، تاجر تنظیماں ، ٹریڈرز اتے پنڈی دے عوام دے تعاون نال ون بلینکٹ موومنٹ دے تحت 30ٹرک بشمول 50ہزار سوڑیں ، کمبل، سراݨے ، میٹرس تے ٻیا سامان اپر دیر، لوئر دیر، سوات ، شانگلہ ، کوہستان ، ڈیرہ اسماعیل خان اتے خیبرپختونخوا دے ٻئے متاثرہ علاقیں دے پاسے روانہ کیتا ڳئے ، وزیراعظم ݙو مہینے سیلاب آلے علاقیں اچ گزارین تے انہاں تہیہ کیتا ہویا اے جو سیلاب توں متاثرہ ساڈھے ترائے کروڑ توں ودھ لوکاں کوں نویں گھراں اچ آباد کریسوں۔