مشعال ملک دی حریت رہنما الطاف شاہ دی تہاڑ جیل اچ دوران حراست وفات تے مودی حکومت تے تنقید

اسلام آباد۔11اکتوبر(اے پی پی):پیس اینڈ جسٹس پارٹی دی چیئرپرسن اتے کشمیری حریت رہنما یاسین ملک دی ذال مشعال ملک کل جماعتی حریت کانفرنس دے رہنما الطاف احمد شاہ دی دوران حراست وفات تے مودی حکومت کوں کڑی تنقید دا نشانہ بݨیندے ہوئیں آکھیے جو ایں قتل دی وجہ بھارتی حکومت دا ظالمانہ رویہ اے۔کشمیرمیڈیاسروس موجب مشعال ملک ھک ٹویٹ اچ آکھیے جو الطاف احمد شاہ دے دوران حراست انتقال دی وجہ بھارتی حکومت دا ظالمانہ رویہ اے ۔انہاں لکھیے جو حریت رہنما سید علی گیلانی دے داماد الطاف احمد شاہ جیڑھے جو کینسر دے مرض اچ مبتلا تھے گزیل 5سال توں دہلی دی بدنام زمانہ تہاڑ جیل اچ قید ہن ۔انہاں آکھیے جو گردیں دے کینسر دے باوجود انہاں علاج معالجے دیاں سہولتاں توں محروم رکھیا ڳئے تے کینسر جسم دے ٻئے حصیں تئیں کھنڈݨ دے بعد انہاں کوں ہسپتال منتقل کیتا ڳیا ۔ مشعال ملک آکھیے جو الطاف شاہ دے قتل دا ذمہ دار بھارت اے۔انہاں ھک ٻئے ٹویٹ اچ الطاف احمد شاہ کیتے دعائے مغفرت کریندے ہوئیں آکھیے جو بھارت اچ کشمیری قیدیاں دا کوئی وی ساتھ نی ݙیندا ۔واضح رہے جو سرینگر دے علاقے صورہ دے رہائشی حریت رہنما الطاف احمد شاہ کوں 25جولائی 2017 کوں 6 ٻئے لوکاں دے نال بھارتی تحقیقاتی ادارے این آئی اے ھک کوڑے مقدمے اچ گرفتار کیا ہئی تے او مسلسل تہاڑ جیل اچ قید ہن۔