وفاقی وزیر اطلاعات مریم اورنگزیب دا ارشد شریف دی کینیا اچ موت تے افسوس، ارشد شریف دی والدہ اتے پاکستان اچ کینیا دے سفیر کوں ٹیلی فون

اسلام آباد۔24اکتوبر (اے پی پی) وفاقی وزیر اطلاعات تے نشریات مریم اورنگزیب سینئر صحافی اتے اینکر پرسن ارشد شریف دی کینیا اچ افسوسناک موت تے ارشد شریف دی والدہ اتے پاکستان اچ کینیا دے سفیر کوں ٹیلیفون کیتا۔ ارشد شریف دی والدہ نال تعزیت کریندیں ہوئیں انہاں آکھیا جو حکومت پاکستان ارشد شریف دی موت بارے کینیا دی حکومت اتے حکام نال رابطے اچ اے۔ ارشد شریف دی موت تے ٻہوں ݙکھ اے، انہاں دے ٹٻر دے ݙکھ اچ برابر دے شریک ہیسے۔ ارشد شریف دی موت دی وجوہات دا پتہ کرݨ دی کوششاں کریندے پیوں۔ انہاں آکھیا جو پاکستانی میڈیا تے ارشد شریف بارے جاری قیاس آرائیاں افسوسناک ہن۔کینیا اچ پاکستان دی سفیر پولیس حکام نال رابطے اچ ہن اتے آئی جی دے دفتر ویندی پئن۔ ایندے علاوہ پاکستان اچ کینیا دے سفیر نال وی رابطہ تھیے انہاں تعاون دا یقین ݙوائے۔ وفاقی وزیر دعا کیتی جو   اللہ تعالیٰ مرحوم کوں  جنت الفردوس اچ ڄاہ ݙیوے اتے انہاں دے ٹٻر کوں صبر ݙیوے۔