وزیراعظم شہباز شریف دا ارشد شریف واقعہ دا اعلیٰ عدالتی کمیشن توں تحقیقات کراوݨ دا اعلان

اسلام آباد۔25اکتوبر(اے پی پی)وزیراعظم محمد شہباز شریف کینیا اچ سینئر صحافی ارشد شریف نال واقعے دی اعلیٰ عدالتی کمیشن توں تحقیقات کراوݨ دا اعلان کریندے آکھیے جو واقعہ دے حقائق قوم دے اڳو ڳھن آسوں، اتے شفاف تحقیقات کیتی ویسی۔ اپݨے سنیہے اچ وزیراعظم آکھیا جو کینیا اچ تھیوݨ آلا واقعہ قابل مذمت اے، پاکستان دے عوام ارشد شریف دی موت تے ݙکھی ہین، واقعہ دی جتنی مذمت کریڄے او ڳھٹ اے۔ انہاں آکھیا جو میں کینیا دے صدر نال الائے اتے واقعہ دی تحقیقاتی رپورٹ منڳی اے جو میت تیکھے ٻھیڄی ونڄے، ایں سانڳے کینیا میت ٻھڄوا ݙتی اے، امید اے جو کینیا تحقیقات اچ وی تعاون کریسی۔ وزیراعظم آکھیا جو واقعہ دی اعلیٰ عدالتی کمیشن توں شفاف تحقیقات کراوݨ دا فیصلہ کیتے جیندے کیتے ہائی کورٹ دے جج کوں آکھسوں ڄݙاں جو ایں فیصلہ دی کابینہ توں وی توثیق کرائی ویسی، اے واقعہ اساں ساریں کیتے افسوسناک اے، یقین ݙوینداں جو واقعہ دی شفاف تحقیقات تھیسن اتے حقائق سامݨے ڳھن آسوں۔