وزیراعظم شہباز شریف نال مصر دے سفیر دی ملاقات، COP-27 کانفرنس بارے ڳالھ مہاڑ

اسلام آباد۔27اکتوبر (اے پی پی) وزیراعظم محمد شہباز شریف پاکستان اتے مصر وچال اقتصادی شعبے اچ تعاون ودھاوݨ دی لوڑھ تے زور ݙیندیں ہوئیں آکھیا جو ݙوہیں ملکاں دی قیادت اتے وسیع تر عوامی تے ادارہ جاتی رابطے دے ودھارے ٻہوں اہم اے۔ وزیر اعظم آفس دے میڈیا ونگ توں جاری بیان موجب انہاں اے ڳالھیں جمہوریہ مصر دے سفیر طارق محمد دھروج نال ڳالھ مہاڑ کریندیں ہوئیں آکھی جنہاں خمیس کوں انہاں نال ملاقات کیتی۔   ملاقات اچ پاکستان اتے  مصر تعلقات کوں ودھاوݨ اتے مصر اچ آندے مہینے COP-27 کانفرنس کراوݨ بارے ڳالھ کیتی ڳی۔ مصر دے صدر عبدالفتاح  السیسی نال ٹیلی فون تے آپݨٰی ڳالھ مہاڑ دا ذکر کریندیں ہوئیں وزیراعظم پاکستان اچ ماحولیاتی تبدیلیاں پاروں تباہ کن چھل پاروں ٻݨݨ آلی صورتحال تے مصر دی حمایت اتے اظہار یکجہتی دی تعریف کیتی۔ وزیراعظم مصر دے شہر شرم الشیخ اچ COP-27 کانفرنس دی میزبانی تے مصری حکومت کوں مبارخ ݙتی اتے آکھیا جو او   “ماحولیاتی تبدیلی اتے کمزورطبقات بارے اعلیٰ سطحی گول میز کانفرنس” دی مشترکہ صدارت سمیت فعال شرکت دےمنتظر ہن۔ پاکستان COP-27  کانفرنس اچ گروپ 77 تے چین دی نمائندگی وی کریسی۔