پاکستان اچ اڄوکے چھل پاروں 30 ارب ڈالر توں ودھ دا نقصان تھیے، تعمیر نو اتے بحالی کیتے پاکستان کوں 16 ارب ڈالر دی لوڑھ اے، عالمی بینک

اسلام آباد۔28اکتوبر  (اے پی پی) عالمی بینک آکھیا جو پاکستان اچ اڄوکے چھل پاروں 30 ارب ڈالر توں ودھ دا نقصان تھیے، تعمیر نو اتے بحالی کیتے پاکستان کوں 16 ارب ڈالر دی لوڑھ اے۔ اے ڳالھ عالمی بینک ولوں جاری رپورٹ اچ آکھی ڳی۔ رپورٹ اچ آکھیا ڳیا جو اجوکے چھل پاروں قیمتی انسانی جاناں دے ضیان دے علاوہ ہاوسنگ، زراعت، لائیوسٹاک، ٹرانسپورٹ اتےمواصلات دے شعبیاں کوں شدید نقصان تھیے۔ انہاں شعبیاں اچ بالترتیب 5.6 ارب ڈالر، 3.7 ارب ڈالر اتے3.3 ارب ڈالردا نقصان تھیے۔ رپورٹ دے مطابق ساریاں توں ودھ یعنی ستر فیصد نقصان سندھ اچ تھیے۔ بلوچستان نقصان بارے ݙوجھے، خیبرپختوانخواہ تریجھے اتے پنجاب چوتھے نمبر تے اے۔ رپورٹ اچ ݙسیا ڳیا جو اڄوکے چھل پاروں پاکستان اچ 33 ملین لوک متاثر تھین۔ 1730 آپݨٰی جاں توں ہتھ ونڄا ٻیٹھن۔ ایں ویلھے وی کئی متاثرہ علاقیاں اچ پاݨی کھڑے اتے پاݨی پاروں بیماریاں وی تھیندی پئن۔ ایں ویلھے اٹھ ملین توں ود بےگھر لوکاں کوں صحت دے مسئلے ہن۔