اعظم سواتی صرف ایف آئی اے دی حراست اچ رہین، وزیرداخلہ دی الزامات دی تردید

اسلام آباد۔28اکتوبر(اے پی پی)وفاقی وزیر داخلہ راناثناللہ آکھیے جو اعظم سواتی دے الزامات کوں پورے زور نال تردید کرینداں، او صرف ایف آئی اے دی حراست اچ رہین بھل انہاں دی عزت و احترام دا پورا خیال رکھیا ڳئے۔ اسلام آباد اچ پریس کانفرنس کریندے وزیر داخلہ آکھیا جو عمران خان ہر کہیں کوں ننگا کرویندا کھڑے، سواتی صاحب وی منت کیتی اے اتے شیخ رشید وی ایہو ترلا کیتے جو میݙے تے اینڄھا الزام نا لوائے، پی ٹی آئی آلیاں کوں جو کڄھ عمران خان آہدے سارے ایندے تے لڳ ویندن، کہیں دی جرات نئیں جو او اوکوں ہٹکن۔ انہاں آکھیا جو ایف آئی اے ٻہوں قابل اعتراض ٹوئٹ تے بالکل ٹھیک مقدمہ درج کیتے، اعظم سواتی کوں دوران حراست چنڳاں گھر دا کھاوݨا، دوائیاں ملدیاں رہین۔ وفاقی وزیر داخلہ آکھیا جو کہیں جتھے کوں اسلام آباد تے چڑھائی دا موقع نہ ݙیسوں، اے جتھہ کلچرل ریاست دا وجود مکا ݙیسی۔ میݙیا نال الیندے انہاں آکھیا جیکر پی ٹی آئی قانون دے مطابق آسی تاں اساں وی اپݨی ذمہ داری نبھیسوں، پہلے توں موجود عدالتی احکامات دے مطابق مقررہ ڄاہ تے مکمل سکیورٹی نال احتجاج دا موقع ݙیسوں۔ انہاں آکھیا جو لوکاں کوں عمران خان دا کوڑا بیانیہ گھول تے پلایا ویندا پئے، چنڳاں ہوسی عمران خان پنجاب حکومت ڈس مس کرݙیون۔ ارشد شریف بارے رانا ثناء آکھیا جو اے معاملہ انکوائری کمیشن کوں ݙے ݙتے، ٻہوں ڳالھیں سامݨے وی آئن ٻھل کمیشن دی رپورٹ وزارت داخلہ کوں ملسی تاں واضح تھیسی۔