اسلام آباد۔6نومبر (اے پی پی) وزیراعظم محمد شہباز شریف 7-8 نومبر 2022 کوں ”شرم الشیخ کلائمیٹ امپلی منٹیشن سمٹ” (کوپ-27) اچ شرکت کیتے مصر دے شہر شرم الشیخ دا دورہ کریسن۔ وزیر اعظم دے رلے وزیر خارجہ بلاول بھٹو زرداری اتے کابینہ دے ٻئے ارکان اتے اعلیٰ حکام وی ہوسن۔ وزیر اعظم آفس دے پریس ونگ ولوں جاری بیان موجب ۔اے سربراہی اجلاس اقوام متحدہ دی موسمیاتی تبدیلی27ویں کانفرنس (کوپ-27) دےہک حصے دے طور تے تھیندا پے۔ وزیر اعظم 8 نومبر 2022 کوں آپݨے نارویجن ہم منصب نال “کلائمیٹ چینج اینڈ سسٹین ابیبلٹی آف ولنرایبل کمیونٹیز” تے ہک اعلیٰ سطحی گول میز مباحثے دی شریک صدارت کریسن۔ وزیر اعظم اعلیٰ سطحی تقاریب بشمول اقوام متحدہ دے سیکرٹری جنرل دی ایگزیکٹیو ایکشن پلان دے ابتدائی وارننگ سسٹمز دے آغاز کیتے گول میز اچ بطور سپیکر وی شریک تھیسن اتے ست نومبر کوں “مڈل ایسٹ گرین انیشیٹو سمٹ”جئیں دی میزبانی سعودی عرب دے ولی عہد اتے وزیر اعظم محمد بن سلمان کریندے پئن اچ وی شریک تھیسن۔ وزیر اعظم سمٹ دی سائیڈ لائنزتے کئی عالمی رہنماواں نال ݙو پاسہ ملاقاتاں وی کریسن۔ کوپ-27 ہک ایجھے ویلھے تھیندا پے جݙاں پاکستان دے لکھاں شہری اتے دنیا دےٻے حصیاں اچ کروڑاں لوک ماحولیاتی تبدیلی دے شدید منفی اثرات دا سامݨا کریندے پن۔ ایں رجحان اچ ساریاں توں ودھ متاثر تھیوݨ آلے ہک ترقی پذیر ملک دے طور، پاکستان ماحولیاتی یکجہتی اتے موسمیاتی انصاف دی فوری ضرورت کیتے ہک مضبوط کال کریسی27اقوام متحدہ دے فریم ورک کنونشن آن کلائمیٹ چینج کانفرنس(یو این ایف سی سی سی ) دے تحت فیصلہ سازی دا ساریاں توں وݙا ادارہ اے جیڑھا ماحولیاتی تبدیلی نال نبڑݨ کیتے سانجھی کوششاں دا جائزہ ڳھنݨ اتے اڳوں ودھاوݨ کیتے سالانہ بنیاداں تے اجلاس کریندے۔
