وزیراعظم شہباز شریف دی سعودی ولی عہد نال ملاقات، کثیر الجہتی سانجھے داری کوں ٻیا ودھاوݨ دا عزم

شرم الشیخ۔8نومبر  (اے پی پی) وزیراعظم شہباز شریف دی سعودی  ولیعہد  نال ملاقات،  کثیر الجہتی سانجھے داری کوں ٻیا ودھاوݨ دا عزم کیتے۔ سعودی ولی عہد دا دورہ پاکستان آپسی دلچسپی دے سارے شعبیاں اچ ݙو پاسہ تعاون کوں ٻیا ڳھاٹا کرݨ اچ معاون ثابت تھیسی۔ اے ڳالھیں انہاں سعودی عرب کے ولی عہد اتے وزیراعظم شہزادہ محمد بن سلمان بن عبدالعزیز السعود نال ڳالھ مہاڑ کریندیں ہوئیں آکھی۔ ݙوہیں رہنماواں وچال ملاقات شرم الشیخ اچ’’ کوپ -27 سمٹ‘‘دے موقع تے تھئی۔ ملاقات اچ ݙوہیں رہنماواں مختلف شعبیاں اچ جاری تعاون کوں ٻیا ودھاوݨ کیتے ݙو پاسہ تعلقات دا جائزہ ڳھدا اتے آپسی دلچسپی دے علاقائی اتے عالمی معاملیاں تے وی ڳالھ کیتی۔ وزیراعظم آکھیا جو پاکستان دی عوام خادم حرمین الشریفین شاہ سلمان بن عبدالعزیز السعود دا ٻہوں احترام اتے سعودی عرب دی عوام نال پیار کریندی اے۔ وزیراعظم مملکت اچ کم کرݨ آلے 20 لکھ پاکستانیاں کیتے سعودی عرب دی مزمان نوازی اتے تعاون دا شکریہ ادا کیتا جیڑھا جو ݙوہیں برادر ملکاں دی ترقی، خوشحالی اتے اقتصادی پیش رفت اچ آپݨا کردار ادا کریندے پن۔ ݙوہیں رہنماواں ݙوہیں ملکاں وچال کثیر الجہتی شراکت داری کوں ٻیا ودھاوݨ دا عزم کیتا۔ سعودی ولی عہد دے پاکستان دے آندے دورے دے منتظر وزیراعظم آکھیا جو انہاں کوں اعتماد اے جو اے دورہ آپسی دلچسپی دے سارے شعبیاں اچ ݙو پاسہ تعاون کوں ٻیا ودھاوݨ اچ مدد کریسی۔ وزیر اعظم ’’مڈل ایسٹ گرین انیشی ایٹو ‘‘ دے تحت مربوط ماحولیاتی اقدام دی فعالیت تے ولی عہد دی کوششاں دی وی تعریف کیتی اتے سعودی قیادت کوں پاکستان ولوں پورے تعاون دا یقین ݙوایا۔