اسلام آباد۔8نومبر (اے پی پی) خواجہ غلام فرید دی شاعری اچ امن تے محبت دا سنیھا آفاقی اے، صوفی دی فکر تئیں پجݨ کیتے سرائیکی زبان کوں پڑھݨا اتے پڑھاوݨا پوسی، خواجہ فرید انسان دوست ہن، انہاں دی پوری حیاتی انسان دوستی نال بھری پی اے۔ اے ڳالھیں سرائیکستان ڈیموکریٹک پارٹی دے اگواݨ خواجہ شعیب الحسن خواجہ فرید دی حیاتی بارے سرائیکی نیوز سروس نال خصوصی ڳالھ مہاڑ کریندیں ہوئیں آکھی۔ انہاں آکھیا جو خواجہ فرید خود پسندی دے خول توں نکل تے ہک سچے عاشقِ حقیقی ہن، انہاں دی محبت صرف انساناں تئیں محدود نی بلکہ حیوانیات تے نباتات وی شامل ہن اتے صوفی دی فکر تئیں پڄݨ کیتے سرائیکی زبان کوں پڑھݨا اتے پڑھاوݨا پوسی۔ خواجہ فرید دی صوفیانہ شاعری اتے تصوف دی لو اڄ تئیں پورے جوبن دے نال چمکدی پی اے۔ خواجہ صاحب دی فکر فرد شناسی توں خداشناسی تئیں کھںڈی ہوئی اے۔ حضرت خواجہ غلام فریدؒ کوں سرائیکی زبان دا بے بدل شاعر منیا ویندے۔ اے حقیقت اے جو 150 سال پہلے دی شاعری اڄ وی وسیب دے دلاں تے راج کریندی اے۔ خواجہ فرید دی شاعری انسان دوستی دا محور اے۔ انہاں دی پوری حیاتی انسان دوستی نال بھری پی اے۔ خواجہ شعیب الحسن سرائیکی وسیب دے مسئلیاں تے ڳالھ مہاڑ کریندیں ہوئیں آکھیا جو اگر اساں خواجہ فرید دی شاعری تے عمل کروں جئیں دا موضوع انسان اے تاں زندگی دی ٻہوں مشکلات توں جان چھڑا سڳدوں۔
