اسلام آباد۔4دسمبر(اے پی پی):پاکستان بیت المال دے مینیجنگ ڈائریکٹرعامر فدا پراچہ آکھیے جو پورے ملک دے سویٹ ہومز اچ رہائش پذیر یتیم ٻالاں کوں گریجویشن دی سطح تئیں تعلیم حاصل کرݨ دی سہولت ݙیوݨ کیتے ھک پائلٹ پروجیکٹ شروع کرݨ دا فیصلہ کیتے ۔ اے پی پی نال ھک خصوصی انٹرویو اچ انہاں آکھیے جو ایں توں پہلے سویٹ ہومزدے ٻالاں کوں میٹرک دی سطح تئیں تعلیمی ضروریات ݙتیاں ویندیاں پیاں ہن لیکن ہݨ انہاں کوں گریجویشن دی سطح تئیں تعلیم حاصل کرݨ اچ مدد کیتے پائلٹ پروجیکٹ شروع کیتا ویندا پئے ۔ ایں ویلھے پورے ملک اچ کم کرݨ آلے 51 سویٹ ہومز جدید فلاحی نقطہ نظر کوں اپنیندے ہوئیں 4355 یتیم ٻالاںکوں رہائش، تعلیم اتے کفالت دی لوڑھ کوں پورا کریندے پئن ۔ عامر فدا پراچہ اے وی انکشاف کیتے جو پاکستان بیت المال آپݨی نگرانی اچ ہر سویٹ ہوم دے نال ھک ٹیکنیکل سکول قائم کرݨ دا منصوبہ بݨائے تاں جو او ٻال جیڑھے تعلیم حاصل نی کرسڳدے یا رسمی تعلیم حاصل کرݨ دا رجحان نی رکھیندے انہاں کوں پیشہ ورانہ تے فنی مہارتاں نال آراستہ کیتا ونڄ سڳے تے آپݨے تے آپݨے خاندان دی کفالت کرݨ دے قابل بݨایا ونڄ سڳے ۔ ملک اچ ودھدی چائلڈ لیبر دے مسئلے نال نبݨݨ کیتے پورے ملک اچ 159 ٻالاں دی مشقت نال بحالی دے مرکز قائم کیتے ڳئن جیڑھے جو ٻالاں کوں انہاں دے کم دی جاہ توں کڈھݨ کیتے کم کریندے پئن تاں جو انہاں کوں غیر رسمی تعلیم دے ذریعے مرکزی دھارے اچ شامل کیتا ونڄ سڳے ۔ انہاں بحالی مراکز توں آوݨ آلے ٻالاں کوں پاکستان بیت المال 4100 روپے دی گرانٹ دے ذریعے جماعت ہشتم تئیں تعلیم کیتے سرکاری اسکولاں اچ داخلہ کرایا ویندے ۔ یتٰمٰی اتے بیوگان سپورٹ پروگرام بارے مینجنگ ڈائریکٹر آکھیے جو اے پروگرام جیڑھا جو ھک مشروط کیش ٹرانسفر انٹروینشن اے، بنیادی طور تے یتیماں، خاص طور تے چھوہریں دی تعلیم تے توجہ ݙیوݨ دے نال بیوہ کوں مالی امداد ݙیوݨ کیتے تیار کیتا ڳئے ، ایں پروگرام دے تحت 75 فیصد اسکول حاضری دی تعمیل تے بالترتیب ماہانہ 8 ہزار روپے ݙتے ویندن تے ھک توں ودھ ٻال آلے خانداناں کوں 16,000 ہزار روپے ماہانہ ادا کیتے ویندن ایں پروگرام دے تحت کل 692 خانداناں کوں دسمبر 2020 توں ہݨ تئیں 23.598 ملین روپے دے معاوضے ݙتے ڳئن ۔
