قیمتی جاناں کوں بچاوݨ کیتے ٹریفک قوانین تے عمل ضروری اے، صدر مملکت ڈاکٹر عارف علوی دا بین الاقوامی کانفرنس توں خطاب

اسلام آباد۔8فروری (اے پی پی) صدر مملکت ڈاکٹر عارف علوی روڈ سیفٹی بارے شعور اجاگر کرݨ دی لوڑھ تے زور ݙیندیں ہوئیں آکھیا جو قیمتی جاناں کوں بچاوݨ کیتے ٹریفک قوانین تے عمل ضروری اے، ودھدی آبادی اتے گاݙیاں اچ ودھارے پاروں قدرتی ماحول متاثر تھیندا پے۔ صدرمملکت اے ڳالھیاں بدھ کوں روڈ سیفٹی بارے پارلیمنٹرینز دی ݙو روزہ بین الاقوامی کانفرنس دے افتتاح سیشن توں خطاب کریندیں ہوئیں آکھی جئیں دا اہتمام انٹرنیشنل پارلیمنٹرینز کانگریس (آئی پی سی) یورپی یونین دے مالی تعاون نال چلݨ آلے منصوبے مستحکم پارلیمان اتے پاکستان انسٹی ٹیوٹ آف پارلیمانی سروسز دے سانجھ نال کیتا ہئی۔ کانفرنس اچ پوری دنیا توں پارلیمنٹرینز، چیئرمین سینیٹ محمد صادق سنجرانی، یورپی یونین دے نمائندے، غیر ملکی سفارت کار، ملکی اتے غیر ملکی اراکین پارلیمنٹ اتے مختلف شعبہ ہائے زندگی توں تعلق رکھݨ آلی شخصیات شریک تھئی۔ عالمی ادارہ صحت دے ڈائریکٹر جنرل ٹیڈروس اذانوم گیبریئس ایں موقع تے اپݨے ویڈیو سنیھے اچ آکھیا جو روڈ سیفٹی کیتے 2021-2030 دے گلوبل پلان اچ ٹریفک اموات کوں ادھ کرݨ دی لوڑھ تے زور ڈتا۔