اسلام آباد۔11اپریل(اے پی پی) وزیراعظم دے رابطہ کار معیشت وتوانائی بلال اظہرکیانی آکھیے عمران خان ویندے ویندے آئی ایم ایف دا پروگرام خراب کیتے جیں توں پاکستان دی معیشت کوں نقصان پڄا، عمران خان دی چارسالہ حکومت تباہ کن ثابت تھئی جیں پاروں ملک کوں معاشی مشکلات دا سامݨا اے۔منڳل کوں ھک انٹرویو اچ انہاں آکھیے پاکستان دی موجودہ معاشی حالت دے اصل ذمہ وارعمران خان اتے انہاں دی 4 سالہ حکومت اے، 2018 تئیں پاکستان دا مجموعی قرضہ 25 ہزار ارب ہئی مگرپچھلی حکومت دے 4 سالہ اقتداراچ او 78 فیصد ودھارے نال 48 ہزار ارب تئیں پڄ ڳئے ، جے پاکستان دے بدترین خساریں دی فہرست بݨائی ونڄے تاں عمران خان دا دورِ اقتدار ایں وچ سرِفہرست آسی ۔ انہاں آکھیے اڄ اساں جیڑھیاں معاشی مشکلات توں گزردے پیوں ایندی بنیاد عمران خان دی حکومت اچ پاتی ڳئی ہئی ، 2018 اچ مسلم لیگ ن حکومت دے خاتمہ تے ملک دی اقتصادی ترقی دی شرح 6.1 فیصد ہئی ، مہانگ دی شرح وی گھٹ ہئی تے سی پیک تے وی تکھا کم تھیندا پیا ہئی ، مسلم لیگ ن دے دوراچ قومی گرڈاچ 12 ہزار میگاواٹ بجلی شامل کیتی ڳئی ۔
