اسلام آباد۔12اپریل (اے پی پی) صدر مملکت ڈاکٹر عارف علوی وفاقی ٹیکس محتسب دے حکم دے خلاف ایف بی آر دی درخواست مسترد کر ݙتی، ایف بی آر کوں اطلاع ݙیوݨ آلے دی سنجاݨ لیک تھیوݨ تے رپورٹ پیش کرݨ دی ہدایت کیتی اے۔ ایوان صدر دے پریس ونگ توں بدھ کوں جاری بیان موجب نجی کمپنی دے اکاؤنٹنٹ کمپنی ولوں ٹیکس فراڈ دی معلومات ایف بی آر کوں ݙتی ہئی، اطلاع ݙیوݨ آلے دی معلومات کمپنی دے مالک کوں لیک کر ݙتی ڳی جئیں تے ملازم کوں دھمکیاں ݙتی ڳی۔ صدرمملکت آکھیا جو ایف بی آر وضاحت کرے تانجو او قومی خزانے کوں نقصان پڄاوݨ آلی کمپنی توں سیلز ٹیکس دی وصولی کیتے ݙتی ڳی معلومات کوں مکمل استعمال کیوں نی کر سڳیا۔ تفصیل موجب محمد الیاس ناردرن ٹولنگز پرائیویٹ لمیٹڈ اچ اکاؤنٹنٹ دے طور کم کریندے پے ہن، انہاں ایف بی آر کوں خبر ݙتی ہئی جو کمپنی مختلف مالی بے ضابطگیاں اچ ملوث اے۔ ایف بی آر کمپنی دے خلاف کارروائی شروع کیتی اتے 1.5 کروڑ روپے دی وصولی کیتی۔ سی ٹی او لاہور دے عملے ٹیکس چوری کرݨ آلی کمپنی دے مالک کوں اطلاع ݙیوݨ آلی دی سنڄاݨ ݙتی جئیں تے کمپنی اکاؤنٹنٹ کوں پولیس اتے ٻی کاروائیاں توں دھمکیاں ݙتی۔ صدر ڈاکٹر عارف علوی ایف بی آر کوں معاملے تے ٹیکس محتسب کوں 60 ݙینھ دے اندر رپورٹ پیش کرݨ دی ودھیکی ہدایت وی ݙتی اے۔
