عمران خان کوں توشہ خانہ ،القادرٹرسٹ اتےکرپشن دے ٻئے کیسز اچ جواب ݙیوݨا پوسی ، عطا تارڑ

اسلام آباد۔8جون(اے پی پی):وزیراعظم دے معاون خصوصی عطا تارڑ آکھیے عمران خان کوں توشہ خانہ ،القادرٹرسٹ اتےکرپشن دے ٻئے کیسز اچ جواب ݙیوݨا پوسی ، پی ٹی آئی کوں چھوڑ تے ونجݨ آلیں کوں سلام پیش کرینداں او غداری دا لیبل لاوݨ دی بجائے ریاست دے نال کھڑن ، او خمیس کوں اسلام آباد ہائیکورٹ دے ٻاہروں صحافیاں نال ڳالھ مہاڑ کریندے پئے ہن ۔ وزیراعظم دے معاون خصوصی عطا تارڑ آکھیے لاݙلے خان  انہاں تاخیری حربیں دا سہارا ڳھدا ،جے او جیل اچ ہوندا تاں بلوچستان اچ ھک معزز وکیل دا قتل نہ تھیندا ، ایں کیس اچ مقتول دے پتر عمران خان کوں ایف آئی آر اچ نامزد کیتے ۔ انہاں آکھیے کریمنل مائنڈڈ اے سمجھدے پئن انہاں دا وجود ریاست توں وݙا اے لیکن اے انہاں کوں بھل اے ۔ انہاں آکھیے اساکوں ماضی دے بدترین دور اچ پنج لوک چھوڑ تے ڳئے ہن لیکن جݙاں او واپس آئے تاں اساں کھلے دل نال انہاں دا استقبال کیتا ۔ انہاں آکھیے جہانگیر ترین گروپ دے ٻہوں سارے لوک ساݙے نال ہن تے کابینہ دا حصہ ہن، مستقبل اچ وی انہاں دے نال ٹرسوں ۔پاکستان مسلم لیگ ن دے راہنما محسن شاہنواز رانجھا آکھیے عمران خان دے وکیل دی طرفوں جیڑھا تاثر ‎ݙتا ڳئے 120 ݙینھ اچ بعد گوشوارے چیک نی تھی سڳدے ،اے بالکل غلط اے ، اساں سپیکر دے سامݨے اپݨا ریفرنس پیش کیتے جیں تے سپیکر قومی اسمبلی معاملہ الیکشن کمیشن کوں بھجوا ݙتا ،ایجھی صورت اچ 120 دی پابندی لاگو نی تھیندی۔ انہاں آکھیے عدالت عظمی دا وی ایں حوالے نال نجیب الدین اویسی فیصلے دی موجودگی اچ کوئی گنجائش کائنی جو اے کریمنل کیس اچ حکم امتناہی ݙتا ونجے۔ انہاں آکھیے الیکشن کمیشن دے فیصلے دے 10 مہینے بعد وی کیس اڳوں نی ودھدا پیا ایندے برعکس محمد نواز شریف دے کیسز دی یومیہ دی بنیاد تے سماعت تھیندی ہئی ، الیکشن توں پہلے فیصلہ کیتا ڳئے ، اے خصوصی ٹریٹمنٹ ساݙی سمجھ توں اُتے ہے ۔