نگران وزیراعظم انوار الحق کاکڑ دا ترائے ضلعیں اچ پولیو وائرس دی موجودگی تے اظہار تشویش ، سارے سٹیک ہولڈرزکوں انسدادپولیو دی آگاہی مہم اچ رلاوݨ دی ہدایت

اسلام آباد۔2اکتوبر (اے پی پی) نگران وزیراعظم انوارالحق کاکڑ ملک دے ترائے ضلعیں اچ پولیو وائرس دی موجودگی  تے تشویش دااظہار کریندے ہوئیں آکھیے علما، استاد، والدین سودھے سارے سٹیک ہولڈرزکوں انسدادپولیو دی آگاہی مہم اچ رلایا وںڄے ۔ وزیراعظم آفس دے میڈیا ونگ توں جاری بیان موجب سنوار کوں نگران وزیرِ اعظم انوار الحق کاکڑ دی ِ صدارت اچ انسداد پولیو کیتے نیشنل ٹاسک فورس دا اجلاس تھیا ۔ وزیراعظم اجلاس توں خطاب کریندے ہوئیں آکھیے پولیو ملک توں منڈھوں مکاوݨ کیتے معاشرے دے ہر طبقے کوں ایں قومی فریضے اچ آپݨا کردار ادا کرݨا ہوسی ۔ ملک دے ٻالاں دے محفوظ اتے صحتمند مستقبل کیتے ہر کہیں کوں ایں مقدس مشن دا حصہ بݨݨا ہوسی انہاں ہدایت کیتی جو علما ، استاد، والدین اتے سارے  سٹیک ہولڈرز کوں انسداد پولیو دی آگاہی مہم دا حصہ بݨایا ونڄے۔ وزیراعظم قانون نافذ کرݨ آلے اداریں کوں ہدایت کیتی جو انسداد پولیو مہم دے دوران پولیو ورکرزدی سکیورٹی یقینی بݨائی ونڄے ۔ انہاں آکھیے ملک اچ پولیو دے گھٹ تھئن مگر توں ایں موذی مرض دے منڈھوں مکݨ تئیں آپدیاں کوششاں جاری رکھیسوں ، قوم سانڳے ساریں توں وݙا خوشی دا ݙینھ او ہوسی جݙاں ملک دا بچہ بچہ ایں خطرناک مرض توں مکمل محفوظ ہوسی، اے حقیقت اے جو سارے علماء کرام بشمول امام کعبہ وی پولیو توں بچاوݨ دے قطریں کوں بالکل محفوظ تے ٻالاں دے معذوری توں پاک مستقبل کیتے ٻہوں ضروری قرارݙتے ۔ وزیرِ اعظم ملک دے ترائے ضلعیں اچ  پولیو وائرس دی موجودگی تےتشویش کریندے ہوئیں ہدایت کیتی جیڑھے ضلعیں اچ پولیو وائرس دی موجودگی دی اطلاع اے اتھاں خصوصی انسداد پولیو مہم چلائی ونڄے پولیو وائرس دے خلاف جنگ ساݙء مستقبل دے بقا دی جنگ اے جئیں کوں اساکوں ہر قیمت تے جتݨا ہوسی ۔ وزیراعظم انسداد پولیو دے قومی پروگرام اچ ودھ چڑھ تے شرکت کرݨ تے تعاون تے سارے بین الاقوامی شراکت داراں دا شکریہ ادا کیتے ۔ اجلاس کوں ݙسایا ڳئے جو 2022 اچ ملک اچ رپورٹ تھئے 20 کیساں دی نسبت اڄوکے سال حالی تئیں صرف ݙو کیس رپورٹ تھئن جیں دی وݙی وجہ قومی سطح تے انسداد پولیو مہم دا تسلسل تے حکومتی کوششاں ہن ۔ وزیرِ اعظم وزارت صحت، نیشنل ٹاسک فورس، صوبائی حکومت تے انتظامیہ اتے قانون نافذ کرݨ آلے اداریں دی انسداد پولیو کیتے کوششاں دی تعریف کیتی ۔اجلاس کوں صوبائی وزرا اعلی اتے چیف سیکریٹریز پولیو دی صوبیں اچ موجودہ صورتحال تے حکومتی کوششاں دا ݙسایا ۔اجلاس اچ نگران وفاقی وزیرِ صحت ڈاکٹر ندیم جان، نیشنل ٹاسک فورس دے اعلی ٰحکام، چارے صوبیں دے نگران وزرائےاعلی، چیف سیکریٹریز، قانون نافذ کرݨ آلے اداریں دے نمائندیں تے متعلقہ اعلی حکام شرکت کیتی۔