دوبئی۔3دسمبر (اے پی پی) نگران وزیر اعظم انوار الحق کاکڑ آکھیا جو کوپ 28 اچ ترقی پذیر ملکاں کیتے موسمیاتی مالیات تے پاکستان دے موقف کوں منیا ڳئے۔ وزیراعظم آکھیا جو پاکستان ولوں کوپ27 اچ لاس اتے ڈیمیج فنڈ دی وکالت کیتی ڳئی ہئی تانجو ترقی پذیر ملکاں کوں موسمیاتی چیلنجز نال نبڑݨ اچ تخفیف اتے خطرے اچ ڳھٹکی بارے مدد کیتی ونڄ سڳے۔ کوپ28 دے موقع تے اسکائی نیوز عربیہ کوں ݙتے ڳئے ہک انٹرویو اچ انہاں آکھیا جو لاس اتے ڈیمیج فنڈ دی آپریشنلائزیشن ایں ڳالھ دا ثبوت اے جو ترقی یافتہ ملکاں اخلاقی طور ایں دلیل کوں قبول کیتے جو دنیا کوں انہاں ملکاں دی حمایت کرݨی چاہیدی اے جیڑھے جو موسمیاتی ضیان دے ذمہ وار کائنی۔ انہاں آکھیا جو پاکستان ہمیشہ توں ایں ڳالھ دی وکالت کریندا رہیت جو جنہاں ملکاں کاربن دے اخراج اچ حصہ نی پاتا پر او موسمیاتی آفات توں ساریاں توں ودھ متاثر تھین انہاں کوں چیلنجز نال نبڑݨ کیتے تخفیف، موسمیاتی موافقت اتے کلائمیٹ فنانس دی صور معاوضہ ݙتا ونڄے۔ انہاں آکھیا جو متحدہ عرب امارات ولوں 30 بلین امریکی ڈالر دے اعلان دے ذریعے لاس اینڈ ڈیمیج فنڈ کوں فعال کرݨ چنڳی شروعات اے۔ انہاں آکھیا جو کشمیر پاکستان دا اٹوٹ انگ اے اتے مسئلہ کشمیر کوں اقوام متحدہ دی سلامتی کونسل دی قرارداداں دے مطابق حل کرݨ دی لوڑھ اے۔
