معیشت دی بہتر صورتحال پاروں سٹاک مارکیٹ تکھی تھئی اے، نگران وزیراعظم انوار الحق کاکڑ

کراچی۔8دسمبر  (اے پی پی) نگران وزیراعظم انوار الحق کاکڑ آکھیا جو معیشت دی بہتر صورتحال پاروں سٹاک مارکیٹ تکھی تھئی اے جیڑھی جو ہݨ ٻہوں اُتے تھی ڳئی اے۔ آئی ایم ایف نال سٹینڈبائی معاہدے پاروں سرمایہ کاراں دا اعتماد بحال تھیے۔ ایجھے معاشی استحکام کیتے کوشش کریندے پیوں جئیں دے فیدے ہر طبقے کوں تھیون۔ وفاقی حکومت معیشت دی بہتری کیتے سرمایہ کاروں کوں سہولت ݙیندی رہسی۔ اے ڳالھیں انہاں جمعے کوں پاکستان سٹاک ایکسچینج اچ ملکی معاشی ترقی اتے اقتصادی لچک بارے تھیوݨ آلی تقریب توں خطاب کریندیں ہوئیں آکھی۔ ایں موقع تے نگران وفاقی وزیر خزانہ تے محصولات ڈاکٹر شمشاد اختر اتے وزارت خزانہ ،  سٹاک مارکیٹ  ، سکیورٹیزاینڈ ایکسچینج کمیشن آف پاکستان تے ٻئے متعلقہ حکام وی موجود ہن۔  نگران وزیراعظم آکھیا جو ملک دی معیشت اچ سٹاک مارکیٹ دا ٻہوں اہم کردار اے۔ وزیراعظم آکھیا جو حکومتی سکیورٹیز  آکشنز ، سرمایہ کاراں دا اعتماد ودھاوݨ، قرضے ڳھنݨ اچ سوکھ ݙیوݨ اتے شفافیت ودھاوݨ کیتے کم کریندے پیوں۔ بعد اچ وزیراعظم رسمی گھنٹہ وڄا تے سٹاک مارکیٹ اچ کاروباری کم شروع کیتا۔ تقریب نال نگران وفاقی وزیر برائے خزانہ تے محصولات ڈاکٹر شمشاد اختر وی خطاب کیتا۔