زندگی کوں بامقصد ٻݨاوݨ کیتے تعلیم ضروری اے، پاکستان اچ کھل تے الاوݨ دی پوری آزادی اے، گورننس کوں بہتر کرݨا پوسی، نگران وزیراعظم انوار الحق کاکڑ

کراچی۔8دسمبر  (اے پی پی) نگران وزیراعظم انوارالحق کاکڑ آکھیا جو زندگی کوں بامقصد ٻݨاوݨ کیتے تعلیم ضروری اے، پاکستان اچ کھل تے الاوݨ دی پوری آزادی اے، گورننس کوں بہتر کرݨا پوسی۔ سارے پاکستانی برابر ہن، میرٹ دا نظام لاگو کیتے بغیر اڳوں نی ودھ سڳدے۔ پروفیشنلز دے ٻاہرلے ملک ونجݨ کوں منفی نی ڳھݨا چاہیدا۔ اے ڳالھیں انہاں جمعے کوں آغا خان یونیورسٹی دے طلبا تے طالبات نال خصوصی ڳالھ مہاڑ اتے سوال جواب دی نشست اچ آکھی۔ نگران وزیراعظم آپݨے ابتدائی کلمات اچ آکھیا جو تعلیم اتے تعلیمی ادارے ہمیشہ میݙے دل دے قریب رہین۔ میکوں ہمیشہ توں سکھݨ نال شغف رہیے۔ گلگت بلتستان دے ہک طالب علم ولوں سوال تے وزیراعظم آکھیا جو گلگت بلتستان جغرافیائی لحاظ نال اہم حیثیت رکھیندے، اے پاکستان دا حصہ اے اتے انشاء اللہ ہمیشہ رہسی۔